លោកនាយករដ្ឋមន្ដ្រីអះអាងថា មន្ទីរពេទ្យគន្ធបុប្ផានឹងមិនងាយដួលរំលំទេ ក្រោយការលាលែងតំណែងរបស់ប្រធានមន្ទីរពេទ្យ លោកវេជ្ជបណ្ឌិត បេអាត រីច្នឺ ដោយថាមានការគាំទ្ររបស់កាកបាទក្រហមកម្ពុជា។
ក្នុងពិធីប្រារព្ធទិវាពិភពលោកកាកបាទក្រហមអឌ្ឍចន្ទក្រហមនៅថ្ងៃទី៨ឧសភានេះ លោកនាយករដ្ឋមន្ដ្រី ហ៊ុន សែន បានថ្លែងថា កាកបាទក្រហមកម្ពុជានឹងបន្ដគាំទ្រដំណើរការជាប្រក្រតីរបស់មន្ទីរពេទ្យគន្ធបុប្ផា ទោះបីជាអតីតស្ថាបនិកមន្ទីរពេទ្យនេះ គឺលោកវេជ្ជបណ្ឌិត បេអាត រីច្នឺ បានប្រកាសលាលែងពីតំណែងប្រធានមន្ទីរពេទ្យ ដោយសារបញ្ហាសុខភាពក៏ដោយ។
លោកនាយករដ្ឋមន្ដ្រី ក៏បានអំពាវនាវដល់សប្បុរសជនជួយគាំទ្រមន្ទីរពេទ្យមួយនេះ ដើម្បីជាប្រយោជន៍ដល់កុមារ និងពលរដ្ឋកម្ពុជាទាំងមូល។
លោកមានប្រសាសន៍ថា៖ «ខ្ញុំរីករាយ ដែលប្រធានកាកបាទក្រហមបានលើកឡើង អំពីការបន្ដផ្ដល់ថវិកាមួយលានដុល្លារសហរដ្ឋអាមេរិក ដែលបានមកពីការចូលរួមវិភាគទាននៅថ្ងៃនេះ សម្រាប់មន្ទីរពេទ្យគន្ធបុប្ផា។ ហើយខ្ញុំ ក៏សូមអរគុណចំពោះសប្បុរសជននានា ដែលបានយកទៅជូនដល់ទៅមន្ទីរពេទ្យគន្ធបុប្ផាផ្ទាល់ បើទោះជាលោកវេជ្ជបណ្ឌិត បេអាត រីច្នឺ ដែលជាអ្នករៀបចំនូវមន្ទីរពេទ្យនេះ ក្នុងស្ថិតក្នុងស្ថានភាពមានជំងឺ។ តែយើងមិនត្រូវទុកឲ្យមន្ទីរពេទ្យមួយនេះដួលរលំ ដោយសារអវត្តមានរបស់វេជ្ជបណ្ឌិត បេអាត រីច្នឺ នោះទេ»។
កាលពីថ្ងៃទី២៨ខែមីនាឆ្នាំ២០១៧ លោកវជ្ជបណ្ឌិត បេអាត រីច្នឺ បានប្រកាសលាលែងពីតំណែងប្រធានមន្ទីរពេទ្យគន្ធបុប្ផាជាបន្ទាន់ ដោយសារមានជំងឺធ្ងន់ធ្ងរ។
ក្រោយការលាលែងតំណែងនេះ មជ្ឍដ្ឋានទូទៅ បានដាក់ការព្រមានពីលទ្ធភាពក្ស័យធន់ផ្នែកហិរញ្ញវត្ថុរបស់ស្ថាប័នសុខាភិបាលមួយនេះ ដែលពលរដ្ឋទូទៅស្គាល់ថា ជាមន្ទីពេទ្យទេវតារបស់កម្ពុជា ដែលតែងជួយព្យាបាលជំងឺប្រជាពលរដ្ឋ ប្រកបដោយវិជ្ជាជីវៈនិងមិនគិតថ្លៃ។
ទោះជាយ៉ាងណា កាលពីចុងខែមីនាឆ្នាំ២០១៧ រដ្ឋាភិបាលនៃប្រទេសស្វ៊ីស រួមជាមួយនឹងមូលនិធិគន្ធបុប្ផា នឹងប្តេជ្ញាចិត្តក្នុងការសហការជាមួយរាជរដ្ឋាភិបាលកម្ពុជា ក្នុងការធ្វើការឆ្ពោះទៅរកនិរន្តរភាពផ្នែកហិរញ្ញវត្ថុ រយៈពេលវែងរបស់មន្ទីរពេទ្យនេះ រួមទាំងធានានៃការបន្តបេសកម្មព្យាលបាលឥតគិតថ្លៃដល់កុមារនិងការថែទាំសុខភាពមាតាមួយ។
រដ្ឋាភិបាលកម្ពុជា ធ្លាប់បានប្រកាសពីសេចក្តីសម្រេចផ្តល់ថវិកាបន្ថែមដល់មន្ទីរពេទ្យគន្ធបុប្ផា ដែលទទួលបានពីការតម្លើងថ្លៃបណ្ណចូលទស្សនារមណីយដ្ឋានអង្គរចំពោះភ្ញៀវទេសចរបរទេសម្នាក់ៗ ចំនួន២ដុល្លារអាមេរិច៕