ប្រជាសហគមន៍បឹងកក់ជាង១០នាក់ បានយកញត្តិដាក់នៅក្រសួងយុត្តិធម៌ឲ្យជួយអន្តរាគមន៍ទៅស្ថាប័នពាក់ព័ន្ធ ដើម្បីដោះលែងអ្នកស្រី ទេព វន្នី ឲ្យមានសេរីភាពក្នុងថ្ងៃបុណ្យវិសាខបូជាខាងមុខនេះ ដោយថាស្រ្តីរូបនោះ មិនបានធ្វើខុសដូចការចោទប្រកាន់នោះទេ។
អ្នកស្រី ទេព វន្នី ត្រូវបានតុលាការកាត់ទោស ដាក់ពន្ធនាគារ២ឆ្នាំកន្លះ ពាក់ព័ន្ធការប្រើអំពើហិង្សាលើសន្តិសុខខណ្ឌដូនពេញ ចំនួនពីរនាក់ឲ្យរងរបួស នៅខាងកើតផ្ទះលោកនាយករដ្ឋមន្ត្រី ហ៊ុន សែន។
ប្រជាសហគមន៍បឹងកក់អ្នកនាង សុង ស្រីលាភ បានថ្លែងប្រាប់អ្នកសារព័ត៌មាននៅមុខក្រសួងយុត្តិធម៌នាព្រឹកថ្ងៃចន្ទទី៨ឧសភានេះថា តុលាការកាត់ទោសអ្នកស្រី ទេព វន្នី ដាក់ពន្ធនាគារ ដោយអយុត្តិធម៌ និងមិនមានភស្តុតាងដាក់បន្ទុកច្បាស់លាស់នោះទេ។
ករណីនេះអ្នកនាងថា ពួកគេនាំគ្នាយកញត្តិដាក់ទៅក្រសួងយុត្តិធម៌ ដើម្បីឲ្យរដ្ឋមន្ត្រីស្ថាប័នមួយនេះជួយអន្តរាគមន៍ទៅស្ថាប័នពាក់ព័ន្ធលើកលែងទោសអ្នកស្រី ទេព វន្នី ឲ្យមានសេរីភាព និងជួបជុំគ្រួសារនៅថ្ងៃវិសាខបូជា។
អ្នកនាងថា៖ «ពួកខ្ញុំបានទទួលដំណឹងថា នៅថ្ងៃវិសាខបូជាខាងមុខនេះ គឺមានការដោះលែងអ្នកទោសមួយចំនួន ខ្ញុំសង្ឃឹមថាអ្នកស្រី ទេព វន្នី ដែលគាត់មិនបានធ្វើអ្វីខុស សូម្បីតែភស្តុតាងក៏មិនមាន ក្រសួងយុត្តិធម៌គួរតែពិចារណា នឹងពិនិត្យធ្វើការដោះលែងអ្នកស្រី ទេព វន្នីឲ្យមានសេរីភាព បានជួបជុំក្រុមគ្រួសារទៅ ពីព្រោះល្មមនឹងធ្វើការដោះលែងពួកគាត់ បញ្ឈប់ធ្វើបាបពួកគាត់ ជាពិសេសអ្វីដែលធ្វើបាបធ្ងន់ធ្ងរបំផុត គឺទឹកចិត្តក្រុមគ្រួសារនៅក្នុងប្រទេសកម្ពុជា ដែលអស់សង្ឃឹមនិងប្រព័ន្ធតុលាការ»។
បន្ទាប់ពីយកញត្តិដាក់នៅក្រសួងយុត្តិធម៌ តំណាងសហគមន៍បឹងម្នាក់ទៀត អ្នកស្រី ប៊ូវ សោភា បានអះអាងថា មន្ត្រីរដ្ឋបាលស្ថាប័ននេះ បានទទួលយកញត្តិពួកគេ ដោយសន្យាថានឹងបញ្ជូនទៅថ្នាក់លើនៅពេលឆាប់ៗខាងមុខនេះ។
អ្នកស្រីឲ្យដឹងទៀតថា នៅព្រឹកថ្ងៃស្អែកពួកគេនឹងនាំគ្នា បន្តយកញត្តិដាក់ទៅស្ថាប័នចំនួន៦ទៀត រួមមាន UN ស្ថានទូតជប៉ុន សហគមន៍អឺរ៉ុប ធនាគារពិភពលោក ទូតអាមេរិក និងទូតបារំាង ឲ្យជួយអន្តរាគមន៍ទៅរដ្ឋាភិបាលកម្ពុជា ជុំវិញករណីខាងលើនេះផងដែរ។
លើសពីនេះទៀត អ្នកស្រី ប៊ូវ សោភា បានបញ្ជាក់ថា ការចាប់ខ្លួនអ្នកស្រី ទេព វន្នី ជាការគំរាមកំហែងមិនឲ្យតស៊ូមតិជួយដល់អ្នករងគ្រោះ ដោយអយុត្តិធម៌សង្គម។
អ្នកស្រីនិយាយថា៖ «នេះជាចេតនាមួយ ដើម្បីបំបាក់ស្មារតីអ្នកស្រី ទេព វន្នី មួយទៀតគឺជាចេតនាមួយ ដើម្បីបំបិទរឿងរ៉ាវបឹងកក់ មួយទៀតមិនចង់ឲ្យអ្នកស្រី ទេព វន្នី គាត់ធ្វើយុទ្ធនាការ ឬមួយ ក៏ធ្វើការណាមួយ ផ្តល់យុត្តិធម៌សម្រាប់សហគមន៍ ឬមួយក៏ជនរងគ្រោះ ដែលគាត់រងនូវអំពើអយុត្តិធម៌ បានន័យថា គេសហការគ្នា ដើម្បីបង្កើតអំពើអយុត្តិធម៌ឡើង ដើម្បីចោទប្រកាន់ប្រជាពលរដ្ឋ»។
VOD មិនអាចសុំការបំភ្លឺបន្ថែមពីអ្នកនាំពាក្យក្រសួងយុត្តិធម៌លោក ជិន ម៉ាលីន និងលោក គឹម សន្តិភាព បានទេនៅថ្ងៃនេះ។ ទោះជាយ៉ាងណា លោក ជិន ម៉ាលីន ធ្លាប់ប្រាប់វីអូឌីថា ការសម្រេចក្តីរបស់តុលាការគឺធ្វើតាមបច្ចេកទេសនិងនីតិវិធីរបស់ខ្លួន ហើយលោកជម្រុញឲ្យអ្នកពាក់ព័ន្ធប្តឹងទៅកាន់តុលាការជាន់ខ្ពស់បន្តទៀត ដើម្បីឲ្យប្រាកដពីយុត្តិធម៌។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត មានប្រសាសន៍ថា ដើមចមដែលនាំឲ្យប្រជាសហគមន៍បឹងកក់នាំគ្នាយកញត្តិដាក់ទៅក្រសួងយុត្តិធម៌ ដោយសារកន្លងទៅលោក ហ៊ុន សែន ធ្លាប់បង្ហើបថា ការលើកលែងទោសឲ្យសកម្មដីធ្លីរូបនេះបាន ដរាបណាសាលក្រមតុលាការចូលជាស្ថាពរ។
ប៉ុន្តែលោក សំអាត បញ្ជាក់ថា នៅពេលបច្ចុប្បន្ននេះ បើក្រសួងនិងរដ្ឋាភិបាលមិនធ្វើការដោះលែងសកម្មជនដីធ្លី មន្ត្រីសិទ្ធិមនុស្សទេ នឹងធ្វើឲ្យប៉ះពាល់ដល់មុខមាត់រដ្ឋាភិបាល និងកម្ពុជាខាតប្រយោជន៍ច្រើនពីសហគមន៍អន្តរជាតិ។
លោកនិយាយថា៖ «យើងឃើញថ្មីៗនេះ ទំាងអង្គការសហប្រជាជាតិ ទំាងសហគមន៍អឺរ៉ុប និងសហរដ្ឋអាមេរិកគេបានទទូច ឬក៏គេបានថ្កោលទោសទាក់ទងការឃុំខ្លួនសកម្មជនការពារសិទ្ធិមនុស្ស ហើយនឹងទទូចឲ្យមានការដោះលែងផងដែរ ហើយប្រសិនជាលោកមិនពិចារណាទេ ការរិះគន់របស់គេ [សហគមន៍អន្តរជាតិ]នៅមានបន្តបន្ទាប់ទៀត ហើយសហគមន៍អឺរ៉ុប គេពិចារណាទាក់ទងនឹងការផ្អាកផ្តល់ជំនួយ ក្នុងការអភិវឌ្ឍន៍ដូចសហរដ្ឋអាមេរិក កាលណាក្នុងការផ្អាកជំនួយសម្រាប់កម្ពុជា សុទ្ធតែពាក់ព័ន្ធនឹងសិទ្ធិមនុស្សនៅកម្ពុជា»។
កាលពីចុងខែកុម្ភៈឆ្នាំ២០១៧ អ្នកស្រី ទេព វន្នី ត្រូវបានសាលាដំបូងរាជធានីភ្នំពេញកាត់ទោស ដោយដាក់ពន្ធនាគារចំនួន២ឆ្នាំកន្លះ ពាក់ព័ន្ធការប្រើអំពើហិង្សាលើសន្តិសុខខណ្ឌដូនពេញពីរនាក់ឲ្យរងរបួស កាលពីថ្ងៃទី១៣ខែមីនាឆ្នាំ២០១៣។ ស្រ្តីសកម្មជនដីធ្លីរូបនេះ ត្រូវបានអាជ្ញាធរចាប់បញ្ជូនទៅឲ្យតុលាការកាត់ទោស៣ដងរួចហើយ។ ករណីនេះ ក្រុមសកម្មជនដីធ្លីនិងអង្គការសិទ្ធិមុស្ស ចាត់ទុកសាលក្រមនោះថា មិនមានយុត្តិធម៌៕
