ក្រុមអ្នកស៊ើបអង្កេតបានឲ្យដឹងនៅថ្ងៃពុធនេះថា ការបង្ក្រាបទៅលើផ្ទះបនដ៏ធំមួយដែលល្បីខាងម៉ាស្សាដោយប្រេងនៅក្នុងទីក្រុងបាងកកនោះ បានរកឃើញនារីបម្រើសេវាផ្លូវភេទជាអនីតិជននិងបញ្ជីកត់ត្រាដែលរៀបរាប់ពីការចំណាយធំៗសូកប៉ាន់នគរបាលនិងមន្ត្រី។
កម្លាំងនគរបាលថៃល្បីខាងប្រព្រឹត្តអំពើពុករលួយ ប៉ុន្តែវាជាករណីដ៏កម្រមួយដែលអាជ្ញាធរថៃបានទម្លាយឲ្យដឹងច្បាស់ពីរបៀបដែលករណីនេះត្រូវបានគេការពារ។
ទីភ្នាក់ងារព័ត៌មាន AFP បានរាយការណ៍ថាមន្ត្រីជាង១០០នាក់មកពីក្រសួងមហាផ្ទៃរបស់ថៃបានឆ្មក់ចូលហាងម៉ាស្សាណាតារី ស្ថិតក្នុងសង្កាត់ដ៏ល្បីល្បាញមួយសម្រាប់ប្រជាជនក្នុងស្រុកនិងជនបរទេស។
នៅអំឡុងការឆ្មក់ចូលបង្ក្រាបកាលពីល្ងាចថ្ងៃអង្គារម្សិលមិញនគរបាលបានរកឃើញឯកសារនានាដែលនិយាយពីការចំណាយប្រាក់មានតម្លៃរាប់ពាន់ដុល្លារទៅដល់នគរបាលនិងមន្ត្រីនៅទីក្រុងបាងកក។
លោក រ៉ុនណារ៉ុង ធិបសិរី ប្រធានការិយាល័យការពារដែនដីដែលចូលរួមក្នុងការបង្ក្រាបនោះបាននិយាយថា សៀវភៅបញ្ជីគណនេយ្យបានបង្ហាញច្បាស់លាស់នូវភ្នាក់ងារនិងមនុស្សទទួលលុយកាក់ដែលភាគច្រើនជានគរបាលនិងភ្នាក់ងារនគរបាល។
លោកបន្ថែមថា ក្រុមរបស់លោកមិនបានរាយការណ៍ព័ត៌មានទៅប្រធានផ្នែកបង្ក្រាបនោះឡើយ ដោយសារ ពួកគេទទួលបានប្រយោជន៍ពីប្រតិបត្តិការនេះ។
រូបថតនៃបញ្ជីមួយក្បាលដែលអ្នកសារព័ត៌មានយកបាននៅក្នុងប្រតិបត្តិការនោះ បានបង្ហាញនូវលុយជាង១ម៉ឺនដុល្លារត្រូវបានគេបង់ឲ្យមន្ត្រីនគរបាលនិងភ្នាក់ងារអនុវត្តច្បាប់នៅក្នុងរយៈពេល២០ថ្ងៃក្នុងខែមីនាឆ្នាំនេះ។
លោក រ៉ុនណារ៉ុង បានឲ្យដឹងថាបញ្ជីមួយក្បាលទៀតបានបង្ហាញនូវទឹកប្រាក់ជិត៥៤ម៉ឺនដុល្លារ ដែលគេបានសូកប៉ាន់ ប៉ុន្តែលោកពុំបានបញ្ជាក់ពីពេលវេលានៃការសូកប៉ាន់នោះឡើយ។
ការបង្ក្រាបនោះបានរកឃើញនារីបម្រើសេវាផ្លូវភេទជាអនីតិជនជាច្រើននាក់ភាគច្រើនជាជនបរទេសដែលវាបង្ហាញឲ្យឃើញថាជនចំណាកស្រុកក្រីក្រវ័យក្មេងៗនៅតែត្រូវបានគេលួងលោមឲ្យចូលក្នុងសេវាផ្លូវភេទនៅថៃ។
លោក រ៉ុនណារ៉ុង បញ្ជាក់ថា៩០ភាគរយនៃនារីទាំង១២១នាក់ដែលបម្រើការនៅក្នុងផ្ទះបននោះគឺជាជនជាតិភូមា ជាពិសេសជនជាតិភាគតិចមកពីតំបន់ព្រំដែននៃប្រទេសទាំងពីរនេះ៕