សមត្ថកិច្ចអះអាងថាមនុស្សមួយនាក់បានស្លាប់និងពីរបីនាក់ទៀតបានបាត់ខ្លួននៅក្នុងហេតុការណ៍លិចទូកដនៅស្រុកល្វាឯម ខេត្តកណ្តាល ដោយសារខ្យល់កន្ត្រាក់ខ្លាំងនៅរសៀលថ្ងៃពុធនេះ។
ស្នងការរងខេត្តកណ្តាល លោក វ៉ែន សុវិន ប្រាប់វីអូឌីថារបាយការណ៍បឋមដែលលោកទទួលបានគឺនគរបាលបានរកឃើញសាកសពយុវជនមួយនាក់។ លោកបន្តថានៅលើទូកដនោះមានមនុស្សប្រមាណ១០នាក់ដែលក្នុងនោះ៦នាក់បានហែលចេញពីទូកនិងត្រូវបានជួយសង្រ្គោះ។ លោកបញ្ជាក់ថាមនុស្សពីរបីនាក់ទៀតមិនទាន់រកឃើញរហូតដល់ម៉ោង៦និង៣០នាទីយប់នេះ។ លោកសន្និដ្ឋានជាជំហានដំបូងថាការលិចទូកដនេះអាចមកពីការធ្វេសប្រហែសរបស់អ្នកបញ្ជាទូក ស្របពេលអ្នកបើកទូករត់គេច ក្រោយពីមានហេតុការណ៍នេះ។
មន្ត្រីប្រចាំបញ្ជារបស់អធិការដ្ឋាននគរបាលស្រុកល្វាឯមប្រាប់វីអូឌីដោយមិនបញ្ចេញឈ្មោះថាទូកនោះដឹកអ្នកដំណើរឆ្លងកំពង់ដពីកោះកែវទៅសំរោងធំ ស្រុកកៀនស្វាយ ហើយបានក្រឡាប់លិចចាក់អ្នកធ្វើដំណើរ និងម៉ូតូ៤គ្រឿង។ លោកបានឲ្យដឹងទៀតថាហេតុការណ៍នេះកើតឡើងនៅវេលាម៉ោង១និង៣០នាទី នៅភូមិកោះកែវ ឃុំកោះកែវ ខណៈពេលដែលមានភ្លៀងខ្លាំងនិងមានខ្យល់កន្ត្រាក់។ លោកបន្ថែមថាសមត្ថកិច្ចកំពុងស្រាវជ្រាវមុជរកជនរងគ្រោះបន្ថែមទៀត៕
