រាជរដ្ឋាភិបាលកម្ពុជាប្រកាសអនុវត្តពន្ធអាករលើតម្លៃបន្ថែម១០% ពីអ្នកខ្ចីលុយពីស្ថាប័នហិរញ្ញវត្ថុ ក្រោយពីក្រសួងសេដ្ឋកិច្ចកំណត់អត្រាការខ្ពស់បំផុតត្រឹម១៨%ក្នុងមួយឆ្នាំឬ១,៥ក្នុងមួយខែកាលពីមុនបោះឆ្នោត ឃុំ សង្កាត់។
ក្នុងសេចក្ដីប្រកាសព័ត៌មាន នៅថ្ងៃទី៧ មិថុនា ឆ្នាំ២០១៧ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានប្រកាសអនុវត្តពន្ធអាករលើតម្លៃបន្ថែម(VAT)១០ភាគរយ ដោយថា សេវាហិរញ្ញវត្ថុដែលមិនជាប់ពន្ធអាករលើតម្លៃបន្ថែម មានដូចជា សេវាហិរញ្ញវត្ថុមូលដ្ឋាន ដែលកំណត់តែទៅលើប្រតិបត្តិការទទួលប្រាក់បញ្ញើ និងការផ្ដល់ឥណទាន តែមិនរាប់បញ្ចូលកម្រៃសេវាផ្សេងៗនោះទេ។
ប្រធានសមាគមមីក្រូហិរញ្ញវត្ថុកម្ពុជាលោក ហួត អៀងតុង ឲ្យ VOD ដឹងថា បន្ទុកបង់ពន្ធនេះ ត្រូវអនុវត្តលើកម្រៃសេវាកម្មហិរញ្ញវត្ថុ ដូចជា សេវាផ្ញើប្រាក់ ការទទួលកម្ចី សេវាផ្នែកច្បាប់ សេវាផ្នែកគណនេយ្យ និងសេវាផ្សេងៗទៀត។ លោកថា មិនមែនតែគ្រឹះស្ថានមីក្រូហិរញ្ញវត្ថុ និងពលរដ្ឋទេ ដែលជាប់កាតព្វកិច្ចបង់ពន្ធនោះ ប៉ុន្ដែក៏មានក្រុមហ៊ុនគ្រឹះស្ថានឯកជន ក្រុមហ៊ុនចម្រុះ និងសមាគមនានាផងដែរ។
លោក ហួត អៀងតុង យល់ថា ការអនុវត្តពន្ធថ្មីនេះនឹងជួយបង្កើតចំណូលជាតិបន្ថែម ប៉ុន្តែពលរដ្ឋក៏ត្រូវជាប់កាតព្វកិច្ចបង់ពន្ធខ្ពស់ជាងមុនដែរ។
លោកថា៖ «ប្រជាពលរដ្ឋគឺគាត់ត្រូវជាប់បន្ទុកបង់ពន្ធលើកម្រៃបន្ថែមហ្នឹង វា Value Added Tax ហ្នឹង អញ្ចឹងពេលប្រជាពលរដ្ឋគាត់ប្រើប្រាស់សេវាកម្មហិរញ្ញវត្ថុ អញ្ចឹងអ្នកដែលប្រើប្រាស់សេវាកម្មហ្នឹង គឺគាត់ត្រូវចំណាយបន្ថែមទៅលើការបង់ពន្ធហ្នឹង»។
ប្រធាននាយកប្រតិបត្តិធនាគារអេស៊ីលីដា លោក អ៊ិន ចាន់នី បានឲ្យភ្នំពេញប៉ុស្ដ៍ដឹងថា បន្ទាប់ពីរដ្ឋាភិបាលប្រកាសអនុវត្តពន្ធនេះ លោកថា កាតព្វកិច្ចបង់ពន្ធលើតម្លៃបន្ថែម១០ភាគរយ ក៏ត្រូវធ្លាក់លើពលរដ្ឋ និងអ្នកដែលប្រើប្រាស់សេវាមួយចំនួនពីធនាគារ លើកលែងតែការប្រាក់ឥណទាន និងកម្រៃប្តូរប្រាក់។
អ្នកជំនាញការផ្នែកហិរញ្ញវត្ថុ ប៉ាន់ប្រមាណថា ចំណូលសរុបរបស់គ្រឹះស្ថានហិរញ្ញវត្ថុ រួមមានធនាគារ និងមីក្រូហិរញ្ញវត្ថុ ទទួលបានពីកម្រៃសេវានិងសោហ៊ុយមានប្រមាណ៣០០លានដុល្លារក្នុងមួយឆ្នាំ ដោយថា រដ្ឋាភិបាលនឹងរកចំណូលចូលជាតិបន្ថែមប្រមាណ៣០លានដុល្លារ ក្នុងមួយឆ្នាំ លើសេវាហិរញ្ញវត្ថុទាំងអស់នេះ ក្រោយអនុវត្តពន្ធអាករលើតម្លៃបន្ថែម១០%នេះ។
ប៉ុន្ដែក្នុងសេចក្ដីប្រកាស អគ្គនាយកដ្ឋានពន្ធដារអះអាងថា ការដាក់ឲ្យអនុវត្ដអាករលើតម្លៃបន្ថែម១០%នេះ មិនមែនជាការបង្កើត ឬអនុវត្តពន្ធថ្មីនោះទេ ដោយថា ពន្ធនេះត្រូវបានដាក់អនុវត្តតាំងពីឆ្នាំ១៩៩៩មកម្ល៉េះ ប៉ុន្ដែរដ្ឋាភិបាលបានអនុគ្រោះមិនយកពន្ធនេះ ដើម្បីសម្រួលដល់ជីវភាពប្រជាពលរដ្ឋ៕