ជនសង្ស័យពាក់ព័ន្ធនឹងគ្រឿងញៀនដល់ទៅ ២២នាក់ ត្រូវបានសមត្ថកិច្ចចាប់ខ្លួន នៅក្នុងប្រតិបត្តិការបង្ក្រាបគ្រឿងញៀននៅទូទាំងប្រទេស ត្រឹមតែមួយថ្ងៃម្សិលមិញនេះ។ នេះដោយយោងតាមរបាយការណ៍របស់នគរបាលជាតិ។
របាយការណ៍ដែលផ្សាយលើគេហទំព័រនគរបាលជាតិ បានឲ្យដឹងបន្ថែមថា បទល្មើសគ្រឿងញៀន ១៧ករណី ត្រូវសមត្ថកិច្ចបង្ក្រាបបាន កាលពីថ្ងៃទី០៧ ខែកក្កដា ដោយឃាត់ជនសង្ស័យដល់ទៅ ២២នាក់ ក្នុងនោះជនសង្ស័យជួញដូរគ្រឿងញៀន ១៥នាក់។
ការស្ទង់មតិមួយកាលពីឆ្នាំមុន បានរកឃើញថា បញ្ហាឧក្រិដ្ឋកម្មគ្រឿងញឿន គឺជាចំណុចខ្សោយមួយរបស់រដ្ឋាភិបាលដឹកនាំដោយគណបក្សប្រជាជនកម្ពុជា។
បទល្មើសគ្រឿងញៀន ត្រូវបានសមត្ថកិច្ចបង្ក្រាបបានរៀងរាល់ថ្ងៃ ដោយចាប់ខ្លួនជនសង្ស័យពាក់ព័ន្ធនឹងគ្រឿងញៀនជាង ៨ពាន់នាក់ហើយ គិតចាប់តាំងពីខែមករាដើមឆ្នាំនេះ៕
