រដ្ឋាភិបាលកម្ពុជា បានសម្រេចផ្អាកការដកហូតអាករតម្លៃបន្ថែមលើសេវាហិរញ្ញវត្ថុ ដោយមិនមានពេលកំណត់ តែជាងមួយខែក្រោយពីបទប្បញ្ញត្តិនេះ ត្រូវបានប្រកាសឲ្យអនុវត្ត។ នេះដោយយោងតាមសេចក្ដីប្រកាសព័ត៌មានរបស់រដ្ឋាភិបាលកម្ពុជាកាលពីពីរថ្ងៃមុននេះ។
ក្រសួងសេដ្ឋកិច្ច និងហិរញ្ញវត្ថុ បានប្រកាសអំពីការដកហូតអាករលើតម្លៃបន្ថែមលើសេវាហិរញ្ញវត្ថុមូលដ្ឋាន នៅក្នុងឧស្សាហកម្មធនាគារ កាលពីថ្ងៃទី២៥ ខែឧសភាកន្លងមកនេះ។
ប៉ុន្តែ ក្នុងសេចក្ដីប្រកាសព័ត៌មានថ្មីមួយទៀតកាលពីថ្ងៃទី០៦ ខែឧសភា អគ្គនាយកនៃអគ្គនាយកដ្ឋានពន្ធដារ លោក គង់ វិបុល បានសម្រេចផ្អាកជាបណ្ដោះអាសន្ននូវការដកហូតអាករលើតម្លៃបន្ថែមនៃសេវាមូលដ្ឋានខាងហិរញ្ញវត្ថុនេះ រហូតទាល់តែមានការជូនដំណឹងជាថ្មី។
លោក គង់ វិបុល បានបញ្ជាក់ក្នុងសេចក្ដីជូនដំណឹងនោះថា ស្ថាប័នលោកនឹងបន្តជជែកគ្នាជាមួយវិស័យហិរញ្ញវត្ថុឯកជន ដើម្បីសិក្សាលម្អិតឡើងវិញនូវនិយមន័យនៃពាក្យ “សេវាជាមូលដ្ឋានខាងហិរញ្ញវត្ថុ” និងការអនុវត្តអាករលើតម្លៃបន្ថែមលើសេវាមិនមែនជាមូលដ្ឋានខាងហិរញ្ញវត្ថុ៕