មហាសេដ្ឋីដែលមានទ្រព្យសម្បតិ្តច្រើនប្រចាំទីក្រុង New York សហរដ្ឋអាមេរិក រងការចោទថា បានប្រព្រឹត្តអំពើពុករលួយ កំពុងស្វែងរកសិទ្ធិជ្រកកោណនៅសហរដ្ឋអាមេរិក។
លោក Guo Wengui ត្រូវបានគេស្គាល់ឈ្មោះមួយទៀតថា Miles Kwok ជាអ្នកប្រឆាំងការដឹកនាំនៃរបបកុម្មុយនីស្តចិន។ នេះបើតាមសារព័ត៌មាន BBC។
មេធាវីការពារក្តីឲ្យមហាសេដ្ឋីរូបនេះបានថ្លែងថា រដ្ឋអំណាចទីក្រុងប៉េកាំងកំពុងតែស្វែងរកការចាប់ខ្លួនកូនក្តីរបស់ខ្លួន ប៉ុន្តែមិនបានបញ្ជាក់ហេតុផលនៃការចោទប្រកាន់ច្បាស់លាស់នោះទេ។
ប្រព័ន្ធផ្សព្វផ្សាយរបស់រដ្ឋចិនបានផ្សព្វផ្សាយថា មហាសេដ្ឋីវ័យ៥០ឆ្នាំរូបនេះ បានសូកប៉ាន់អនុរដ្ឋមន្ត្រីម្នាក់ និង កំពុងជាប់ចោទពីបទឧក្រិដ្ឋផ្សេងៗទៀត។
លោក Guo Wengui បានចាកចេញពីប្រទេសចិនតាំងពីឆ្នាំ២០១៤ ហើយបានផ្សព្វផ្សាយជាបន្តបន្ទាប់ជាវីឌីអូ តាមរយៈ Twitter និង YouTube ដោយចោទប្រកាន់មេដឹកនាំជាន់ខ្ពស់របស់ចិនថា បានប្រព្រឹត្តអំពើពុករលួយ ក្នុងនោះរួមទាំងសមាជិកគណបក្សកុម្មុយនីស្តចិន អង្គភាពប្រឆាំងអំពើពុករលួយជាដើម៕