កងកម្លាំងចម្រុះខេត្តកណ្ដាល នៅថ្ងៃសុក្រនេះ បានចុះរុះរើផ្ទះប្រជាពលរដ្ឋ ៣គ្រួសារតាមអំណាចសាលដីកាតុលាការកំពូល ដែលក្នុងចំណោមនោះ១គ្រួសារជាមន្ត្រីកងរាជអាវុធហត្ថ។
ផ្ទះរបស់គ្រួសារទាំងបីដែលសមត្ថកិច្ចរុះរើនៅថ្ងៃនេះស្ថិតនៅភូមិទួលក្រសាំង ឃុំរការខ្ពស់ ស្រុកស្អាង ខេត្តកណ្ដាល។
ស្នងការនគរបាលខេត្តកណ្តាលលោក អ៊ាវ ចំរើន មានប្រសាសន៍ថា ក្នុងចំណោម៣គ្រួសារនោះ គឺមួយគ្រួសារជាមន្ត្រីកងរាជអាវុធហត្ថលោកថា មានការរឹងរួសជាងគេ មិនព្រមរុះរើតាមការសម្រេចរបស់តុលាការទើបមានការប្រើកម្លាំងបង្ខំរុះរើ។ លោកបញ្ជាក់ថា នេះជាការអនុវត្តន៍ផ្លូវច្បាប់សុទ្ធសាទ មិនមានការប្រកាន់បក្ខពួកនោះទេ។
តាមសាលដីការបស់តុលាការកំពូលបានឲ្យដឹងថា ក្រុមគ្រួសារទាំងនេះបានរស់នៅលើដីចំណីផ្លូវរបស់រដ្ឋ ហើយបានធ្វើផ្ទះប៉ះដីជាកម្មសិទ្ធិឯកជននៅក្បែរនោះទៀត ទើបមានរឿងក្តីដល់តុលាការ។ ប៉ុន្តែខាងក្រុមគ្រួសារម្ចាស់ផ្ទះអះអាងថា ដីនោះពួកគាត់រស់មានការលិខិតស្នាមទទួលស្គាល់ពីអាជ្ញាធរដែនដីត្រឹមត្រូវ។ ម្ចាស់ផ្ទះបានស្រែកយំអំពាវនាវឲ្យលោកនាយករដ្ឋមន្ត្រីហ៊ុន សែន និង មន្ត្រីពាក់ព័ន្ធជួយស្វែងរកយុត្តិធម៌ដល់គ្រួសារពួកគាត់។
