អាជ្ញាធរម៉ាឡេស៊ីកំពុងរៀបចំបង្កើតការផ្សព្វផ្សាយគ្រប់រូបភាពជុំវិញស្ថានភាពទឹកជំនន់ដែលមានការប្រែប្រួលខ្លាំង ដើម្បីសាធារណៈជនបានដឹង និងងាយស្រួលក្នុងការជួយសង្គ្រោះមនុស្សនៅតំបន់ដែលមានការប្រឈមគ្រោះថ្នាក់ខ្លាំង។
រដ្ឋមន្ត្រីក្រសួងទំនាក់ទំនងនិងប្រព័ន្ធផ្សព្វផ្សាយចម្រុះ លោក Salleh Said Keruak ថ្លែងនៅថ្ងៃពុធនេះថា នឹងធ្វើការផ្សព្វផ្សាយតាមគ្រប់រូបភាពតាមការដែលអាចធ្វើទៅបាន ទាំងប្រព័ន្ធផ្សព្វផ្សាយធំៗ និងបណ្តាញទំនាក់ទំនងសង្គមជាដើម ដោយមានការភ្ជាប់ទៅនឹងនាយកដ្ឋានព្យាករណ៍អាកាសធាតុ។ នេះបើតាមទីភ្នាក់ងារព័ត៌មានម៉ាឡេស៊ី Bernama។
រដ្ឋមន្ត្រីក្រសួងទំនាក់ទំនងនិងប្រព័ន្ធផ្សព្វផ្សាយចម្រុះ កំណត់សម្គាល់ឲ្យបានច្បាស់ទីតាំងភូមិសាស្ត្រ ដើម្បីអន្តរាគមន៍ករណីមានការដាច់ទំនាក់ទំនងគ្នាដោយសារស្ថានភាពទឹកជំនន់នៅក្នុងរដ្ឋ Penang និង Kedah។ ទោះយ៉ាងណា លោកថា នៅពេលនេះនៅមិនទាន់មានព័ត៌មានណាដែលបញ្ជាក់ថា ដាច់ការទំនាក់ទំនងនៅឡើយទេ។
ស្ថានភាពទឹកជំនន់នៅក្នុងរដ្ឋទាំងពីររបស់ម៉ាឡេស៊ីនេះ បណ្តាលឲ្យប្រជាពលរដ្ឋជាង ៣០ ០០០នាក់ត្រូវជម្លៀសចេញពីលំនៅឋាន ហើយរដ្ឋាភិបាលបានត្រៀមលុយប្រមាណ៣៥លានដុល្លារសម្រាប់ការដោះស្រាយ៕