រដ្ឋាភិបាលមីយ៉ាន់ម៉ាថ្លែងនៅថ្ងៃពុធនេះ សេចក្តីថ្លែងការណ៍របស់ក្រុមប្រឹក្សាសន្តិសុខអង្គការសហប្រជាជាតិ លើបញ្ហាវិបត្តិជនជាតិភាគតិចរ៉ូហ៊ីងយ៉ា កំពុងតែធ្វើឲ្យមានការលំបាកកាន់តែខ្លាំងចំពោះការចរចារវាងមីយ៉ាន់ម៉ា និង បង់ក្លាដេសក្នុងការធ្វើមាតុភូមិនិវត្តន៍ជនជាតិភាគតិចទាំងនោះ។
ជនជាតិភាគតិចរ៉ូហ៊ីងយ៉ាប្រមាណ ៦០០ ០០០នាក់ បានរត់គេចចេញពីប្រទេសមីយ៉ាន់ម៉ាទៅក្នុងប្រទេសបង់ក្លាដេសគេចចេញពីការធ្វើទុក្ខបុកម្នេញរបស់ពួកយោធា ហើយពេលនេះរដ្ឋាភិបាលមីយ៉ាន់ម៉ា កំពុងតែចរចាក្នុងការរៀបចំទទួលយកជនជាតិភាគតិចទាំងនោះត្រលប់ចូលប្រទេសវិញ។ នេះបើតាមទីភ្នាក់ងារព័ត៌មានរ៉យទ័រ។
ក្រុមប្រឹក្សាសន្តិសុខអង្គការសហប្រជាជាតិ បានចេញសេចក្តីថ្លែងការណ៍មួយកាលពីថ្ងៃចន្ទ ដោយជំរុញឲ្យមីយ៉ាន់ម៉ា ធានាថា មិនមានការធ្វើការដាក់សម្ពាធអ្វីហួសហេតុលើជនជាតិរ៉ូហ៊ីងយ៉ាទៀតទេ។ ក្នុងសេចក្តីថ្លែងការណ៍នោះ ក្រុមប្រឹក្សាសន្តិសុខក៏បានលើកឡើងពីការព្រួយបារម្ភចំពោះស្ថានភាពនៃការរំលោភសិទ្ធិមនុស្ស និងការប្រើអំពើហិង្សារពីសំណាក់ក្រុមយោធា។
ជាការឆ្លើយតបមេដឹកនាំមីយ៉ាន់ម៉ាលោកស្រី អ៊ុង សានស៊ូជី ដែលដឹកនាំរដ្ឋាភិបាលស៊ីវិលជិត២ឆ្នាំមកនេះក្រោមការសហការជាមួយពួកយោធា ថ្លែងថា មីយ៉ាន់ម៉ា និងបង់ក្លាដេស កំពុងតែលើកយកបញ្ហាទាំងនេះចរចាជាលក្ខណៈទ្វេរភាគដោះស្រាយបញ្ហា ហើយថាពេលនេះត្រូវទុកសេចក្តីថ្លែងការណ៍របស់ក្រុមប្រឹក្សាសន្តិសុខអង្គការសហប្រជាជាតិនៅមួយឡែកសិន។
លោកស្រី អ៊ុង សានស៊ីជី បន្តថា សេចក្តីថ្លែងការណ៍នោះបានបានជះឥទ្ធិពលអាក្រក់លើដំណើរការចរចារវាងមីយ៉ាន់ម៉ា និង បង់ក្លាដេសដែលកំពុងតែទទួលបានផលល្អនិងមានការរីកចម្រើនយ៉ាងឆាប់រហ័ស៕
