ប្រធានាធិបតីសហរដ្ឋអាមេរិកលោក ដូណល ត្រាំ ធ្វើដំណើរដល់ទីក្រុងប៉េកាំងនៅរសៀលថ្ងៃពុធនេះ ហើយនឹងមានការជជែកពីបញ្ហាភាពតានតឹងជាមួយកូរ៉េខាងជើង និងការចរចាពីបញ្ហាប្រឈមមុខដាក់គ្នាជុំវិញបញ្ហាទំនាក់ទំនងសេដ្ឋកិច្ច។
លោកបានទៅដល់ប្រទេសចិន ហើយមានការរៀបចំទទួលយ៉ាងកក់ក្តៅពីប្រធានាធិបតីចិន លោក ស៊ី ជីនពីង។ នេះបើតាមសារព័ត៌មាន BBC។
នៅព្រឹកថ្ងៃពុធនេះ នៅក្នុងសភាកូរ៉េខាងត្បូង លោក ត្រាំ បានថ្លែងជំរុញជាថ្មីទៀត ឲ្យចិនធ្វើការឲ្យបានស្និទ្ធបំផុតជាមួយកូរ៉េខាងជើង ដើម្បីដោះស្រាយបញ្ហាកម្មវិធីអាវុធនុយក្លេអ៊ែដែលកំពុងគំរាមកំហែងដល់តំបន់។
មន្ត្រីសេតវិមានបានថ្លែងនៅពេលថ្មីៗនេះថា លោកត្រាំអាចនឹងមានការជជែកពីបញ្ហាកូរ៉េខាងជើង និងបញ្ហាទំនាក់ទំនងការធ្វើពាណិជ្ជកម្មដែលមិនស្មើភាពគ្នាជាមួយចិន៕
