អគ្គលេខាធិកាគណបក្សកុម្មុនីស្តវៀតណាមលោក Nguyễn Phú Trọng នឹងបំពេញទស្សនកិច្ចជាផ្លូវការទៅប្រទេសចិនចាប់ពីថ្ងៃទី១២ដល់ថ្ងៃទី១៥ខែមករា។ នេះបើតាមការលើកឡើងរបស់គណៈកម្មការសម្រាប់ការទំនាក់ទំនងផ្ទៃក្នុងរបស់គណៈកម្មាធិការកណ្តាលគណបក្ស។
សារព័ត៌មានVietnam News បានចុះផ្សាយថា ដំណើរទស្សនកិច្ចនេះ ធ្វើឡើងតាមការអញ្ជើញរបស់គណបក្សកុម្មុនីស្ត និង មេដឹកនាំចិនលោក ស៊ី ជិនពីង។
សេចក្តីប្រកាសព័ត៌មានរបស់ភាគីវៀតណាមឲ្យដឹងថា ការធ្វើដំណើរទស្សនកិច្ចនេះ ធ្វើឡើងចំពេលខួបនៃទំនាក់ទំនងការទូតរបស់ប្រទេសទាំងពីរលើកទី៦៧ ហើយក៏ស្របពេលដែលប្រជាពលរដ្ឋនៃប្រទេសទាំងពីរត្រៀមខ្លួនសម្រាប់បុណ្យចូលឆ្នាំថ្មី។
បច្ចុប្បន្នប្រទេសវៀតណាម និង ប្រទេសចិនកំពុងតែមានជម្លោះតានតឹង ក្នុងការដណ្តើមដែនកោះ នៅក្នុងសមុទ្រចិនខាងត្បូង ដែលអូសបន្លាយមិនទាន់មានដំណោះស្រាយនៅឡើយ៕