ទឹកជំនន់បានរាលដាលនៅភាគខាងត្បូងនៃប្រទេសថៃបានសម្លាប់មនុស្សអស់២១នាក់ ចំណែកផលិតកម្មជ័រកៅស៊ូនៅក្នុងតំបន់កំពុងប៉ះពាល់ ហើយផ្លូវមួយចំនួនត្រូវបានបិទ ហើយកម្រិតទឹកជំនន់នៅតែបន្តកើនឡើងជាលំដាប់។
មន្ត្រីរដ្ឋាភិបាលថៃថ្លែងនៅថ្ងៃចន្ទនេះថា រដូវរស្សានៅថៃបានបញ្ចប់ហើយតាំងពីចុងខែវិច្ឆិកាមក ប៉ុន្តែភ្លៀងច្រើនពេក បង្កជាទឹកជំនន់នៅក្នុងខែមករាដើមឆ្នាំនេះ ដែលភ្លៀងខុសរដូវនេះលិចលង់ខេត្តចំនួន១២ ក្នុងចំណោម៦៧ខេត្ត។ នេះបើតាមទីភ្នាក់ងារសារព័ត៌មានរ៉យទ័រ។
ឧបនាយករដ្ឋមន្ត្រីថៃលោក Prawit Wongsuwanថ្លែងថា លោក បានបញ្ជូន ទាហាន នគរបាល និង មន្ត្រីក្រសួងមហាផ្ទៃទៅតំបន់លិចលង់ដើម្បី ជួយដោះស្រាយបន្ធូរស្ថានការណ៍។
របាយការណ៍របស់នាយករដ្ឋានបង្ការនិងដោះស្រាយបញ្ហាគ្រោះមហន្តរាយ បញ្ជាក់ថា គិតត្រឹមថ្ងៃចន្ទនេះ ចំនួនអ្នកស្លាប់កើនដល់២១ ចំណែកពលរដ្ឋចំនួន៣៣០ ០០០នាក់ទៀត ទឹកលិចផ្ទះសំបែង។ នាយករដ្ឋាននេះ ឲ្យដឹងទៀតថា ព្រលានយន្តហោះ នៅខេត្តភាគខាងត្បូងខេត្តណាខន់ ស៊ី ថាមម៉ារ៉ាត់ នៅតែបន្តបិទបណ្តោះអាសន្ន ចំណែកផ្លូវរថភ្លើងពីបាងកក ទៅ ណាខន់ ស៊ី ថាមម៉ារ៉ាត់ ក៏ផ្អាកដំណើរការដែរ។
ប្រធានក្រុមប្រឹក្សាកៅស៊ូធម្មជាតិរបស់ថៃថ្លែងថា តំបន់ភាគខាងត្បូងគឺជាកន្លែងសំខាន់ក្នុងការផលិតកៅស៊ូ ប៉ុន្តែជំនន់ទឹកភ្លៀងនេះ បង្កការលំបាកយ៉ាងខ្លាំងដល់ដំណើរការផលិត៕