សមាជិកព្រឹទ្ធសភាអាមេរិក លោក Ted Cruz បានជួបពិភាក្សាជាមួយមេដឹកនាំតៃវ៉ាន់ លោកស្រី សៃ អ៊ឹងវេន កាលពីថ្ងៃអាទិត្យម្សិលមិញ បើទោះជាមានការជំទាស់យ៉ាងខ្លាំងពីអ្នកការទូតចិនក៏ដោយ។
លោក Ted Cruz មកពីរដ្ឋ Texas ថ្លែងថា លោកបានពិភាក្សាយ៉ាងស្និទ្ធស្នាលជាមួយមេដឹកនាំតៃវ៉ាន់ លោកស្រី សៃ អំពីការផ្លាស់ប្តូរទំនាក់ទំនងការទូត ទំនងសេដ្ឋកិច្ច និងបញ្ហាមួយចំនួនទៀត។ លោកថា កិច្ចសហប្រតិបត្តិការសេដ្ឋកិច្ច គឺជាចំណុចអាទិភាពនៃការទំនាក់ទំនងរបស់ប្រទេសទាំងពីរ ដែលមានការបង្កើនទំនិញលើទីផ្សាររបស់តៃវ៉ាន់ កើនចំណូលដល់កសិដ្ឋាននៅរដ្ឋ Texas ទាំងម្ចាស់អាជីវកម្មនិងកសិដ្ឋានខ្នាតតូច។ នេះបើតាមទីភ្នាក់ងារសារព័ត៌មាន AFP។
លោកស្រី សៃ ចុះផ្លាស់ប្តូរជើងហោះហើរនៅ Houston ក្នុងរដ្ឋ Texas សហរដ្ឋអាមេរិកកាលពីចុងសប្តាហ៍មុន ក្នុងដំណើរដែលលោកស្រីទៅបំពេញទស្សនកិច្ចនៅអាហ្រ្វិកកណ្តាល។
ក្នុងដំណើរដែលលោកស្រី សៃ ចុះចតនៅអាមេរិកនេះ ត្រូវបានចិនខឹងសម្បារយ៉ាងខ្លាំង ព្រោះចិនចោទថាមេដឹកនាំតៃវ៉ាន់រូបនេះកំពុងស្វែងរកការគាំទ្រពីសហគមន៍អន្តរជាតិ ដើម្បីប្រកាសផ្តាច់ខ្លួនចេញពីចិន៕