ខណៈថ្ងៃបុណ្យនៃក្ដីស្រលាញ់នឹងចូលមកដល់យុវជននិងគូស្នេហ៍ខ្លះក៏មានគម្រោងទិញជាកាដូជូនគ្នាទៅវិញទៅមកដើម្បីទុកជាអនុស្សាវរីយក៏ដូចជាបង្ហាញក្ដីស្រលាញ់របស់ពួកគេ។
ថ្ងៃទី១៤កុម្ភៈនេះត្រូវបានយុវវ័យខ្លះគិតថាជាថ្ងៃបុណ្យសង្សារហើយក៏ទិញផ្កានិងកាដូផ្សេងៗជូនគ្នាដើម្បីដោះដូរជាថ្នូរនៃការដឹកដៃគ្នាឡើងផ្ទះសំណាក់ជាដើម។ ដោយឡែកយុវជនខ្លះមានការយល់ដឹងច្រើនដោយចាត់ទុកថ្ងៃទី១៤កុម្ភៈជាថ្ងៃនៃក្ដីស្រលាញ់ ហើយពួកគេថាគ្រាន់តែជាការរំលឹកនៃសេចក្ដីស្រលាញ់ចំពោះអ្នកនៅជុំវិញខ្លួនតាមរយៈការជូនវត្ថុអនុស្សាវរីយផ្សេងៗ។
កំពុងឈរជជែកគ្នាជាមួយនឹងមិត្តភក្តិក្នុងបរិវេណវិទ្យាល័យសន្ធម៉ុកយុវជន កែ កុសលរតនា ជាសិស្សថ្នាក់ទី១២បានចាត់ទុកថ្ងៃ១៤កុម្ភៈនេះគ្រាន់តែជាថ្ងៃបុណ្យដែលបង្ហាញសេចក្ដីស្រលាញ់ទៅកាន់មនុស្សជុំវិញខ្លួន។ យុវជនរូបនោះក៏មានគម្រោងទិញជាកាដូជូនទៅឳពុកម្តាយនិងសង្សារបស់ខ្លួនផងដែរ។ យុវជន កុសលរតនា បន្ថែមថាខ្លួនក៏មានគម្រោងចង់បបួលសង្សាដើរលេងដែរ ប៉ុន្តែមិនមែនជាលក្ខណៈគូស្នេហ៍តែពីរនាក់ស្ងាត់ៗនោះទេ។
យុវជនរូបនោះបន្ថែមថា៖ “ចង់និយាយថាថ្ងៃទី១៤កុម្ភៈហ្នឹងកុំយកពេលនាំសង្សាទៅណាទៅណីកុំនាំខូចនាំអីតែពីរនាក់ចឹងទៅព្រោះអីឮភាគច្រើនគឺថ្ងៃទី១៤កុម្ភៈហ្នឹងនាំគ្នាទៅណាទៅណីរួមភេទរួមអីចឹងអត់ល្អទេ”។
ដៃកាន់កាបូបរៀនឈរក្នុងបរិវេណវិទ្យាល័យសន្ធរមុកដដែលយុវសិស្សម្នាក់ទៀតឈ្មោះ ម៉េង ច័ន្ទគ្រឹស្នា បានលើកឡើងថាខ្លួនមិនមានសង្សាហើយក៏មិនមានគម្រោងទៅណាដែរសម្រាប់ថ្ងៃ១៤កុម្ភៈខាងមុខ។ ប៉ុន្តែយុវជនរូបនោះបន្ថែមថាខ្លួនមានគម្រោងទិញជាកាដូជូនឳពុកម្ដាយដើម្បីបង្ហាញពីសេចក្ដីស្រលាញ់ចំពោះពួកគាត់។
ដៃកំពុងកាន់សៀវភៅអង្គុយអាននៅក្នុងបរិវេណសាកលវិទ្យាល័យភូមិន្ទភ្នំពេញកញ្ញា ម៉ុច សុខឡា បានលើកឡើងថាថ្ងៃ១៤ កុម្ភៈនេះគ្រាន់តែតែជាថ្ងៃធម្មតាសម្រាប់នាងតែប៉ុណ្ណោះ។ កញ្ញាលើកឡើងបន្ថែមថាបើចង់បង្ហាញនូវសេចក្ដីស្រលាញ់ទៅកាន់មិត្តភក្ដិ បងប្អូន ឬឳពុកម្ដាយថ្ងៃណាក៏យើងអាចបង្ហាញបានដែរព្រោះក្ដីស្រលាញ់មានជារៀងរាល់ថ្ងៃ។
កញ្ញាបន្ថែមថា៖ “ការនាំគ្នាដើរលេងអញ្ចឹងខ្ញុំគិតថាអត់ត្រូវទេខ្ញុំគិតថាបើយើងស្រលាញ់គ្នាចឹងធ្វើតាមប្រពៃណីទៅ ហើយថ្ងៃបុណ្យនៃក្ដីស្រលាញ់នេះគេមិនមែនបញ្ជាក់ចំពោះតែសង្សាទេគឺក្ដីស្រលាញ់ចំពោះមនុស្សគ្រប់រូមទូទៅ មិត្តភក្តិ បងប្អូនមិនមែនសំដៅតែសង្សាមួយមុខទេ។ ថ្ងៃនោះយើងអាចនាំគ្រួសារដើរលេង នាំសង្សាដើរលេងក៏បានដែរ ប៉ុន្តែមិនដល់ថ្នាក់អីជូនកាដូគ្នាហើយដូរគ្នានូវការឡើងផ្ទះសំណាក់វាអត់សម”។
ទាក់ទងថ្ងៃទី១៤កុម្ភៈនេះម្ចាស់ហាងលក់វត្ថុអនុស្សាវរីយទាន់សម័យមួយកន្លែងក្បែរផ្សារអូរឬស្សីអ្នកស្រី ចាន់ សុផល លើកឡើងថាជារៀងរាល់ឆ្នាំហាងរបស់អ្នកស្រីមានការរៀបចំជាបាច់ផ្កានិងកាដូសម្រាប់លក់ថ្ងៃ១៤កុម្ភៈ។ អ្នកស្រីបន្ថែមថារាល់ឆ្នាំក្មេងៗមានការជ្រួលជ្រើមតាមគ្នាក្នុងការទិញវត្ថុអនុស្សាវរីយជូនសង្សា ប៉ុន្តែឆ្នាំនេះការលក់ដូរមានការធ្លាក់ចុះពាក់កណ្ដាលបើគិតត្រឹមការលក់ថ្ងៃបុណ្យណូអែលចុងឆ្នាំ២០១៥មក។
អ្នកស្រីបន្ថែមថា៖ “រាល់ឆ្នាំ៥ទៅ៦នាក់ខ្ចប់អត់ទាន់ទេនៅឈរចាំដល់ពេលឆ្នាំនេះតែ៣នាក់ក៏យើងខ្ចប់ទាន់ដែរអត់ប្រញឹក អត់ជាន់គ្នា។ រាល់ឆ្នាំមនុស្សគរជើងគ្នាឈរចាំអាចប្រហែលជាឆ្នាំនេះស្ងាត់ជាងឆ្នាំមុន”។
ទោះបីជាយុវវ័យមានការយល់ដឹងច្រើនជាងមុនទាក់ទងនឹងថ្ងៃបុណ្យនៃក្ដីស្រលាញ់ ប៉ុន្តែឳពុកម្ដាយមួយចំនួននៅតែមានការព្រួយបារម្ភពីការភ្លើតភ្លើនរបស់កូនក្នុងថ្ងៃបុណ្យនៃក្ដីស្រលាញ់នេះ។
អង្គុយចាំដឹកម៉ូយនៅខាងមុខផ្សារបឹងកេងកងអ្នករត់ម៉ូតូកង់បីម្នាក់លោក សែម ធី មានប្រសាសន៍ក្មេងសម័យឥឡូវមានការយល់ដឹងច្រើនរឿងស្នេហាដែលជាការគួរឲ្យព្រួយបារម្ភ។ លោកបន្ថែមថាចំពោះថ្ងៃនៃក្ដីស្រលាញ់នេះអាចជាការបើកឱកាសឲ្យយុវជនប្រព្រឹត្តខុសប្រពៃណីនិងច្បាប់ទំលាប់។
លោកបន្ថែមថា៖ “ជំហានទីមួយអាចស្រលាញ់គ្នាទាក់ទងពីតូចទៅធំ ប៉ុន្តែដល់ចុងបញ្ចប់អាចឈានដល់ដំណាក់កាលមួយ ជូនកាលដល់ពេលចុងបញ្ចប់ស្រលាញ់គ្នាពិតប្រាកដយ៉ាងណានោះមិនអាចទុកចិត្តទេ។ ភាពទាក់ទងគ្នាពីតិចទៅច្រើនដល់ពេលពិតប្រាកដទៅជូនកាលអាចមានក្ដីស្រលាញ់មួយខុសនឹងច្បាប់”។
អ្នកស្រាវជ្រាវពីបញ្ហាសង្គមលោក តុង សុប្រាជ្ញ មានប្រសាសន៍ថាមុនពេលថ្ងៃនៃក្ដីស្រលាញ់មកដល់យុវជនមិនទាន់បង្ហាញសកម្មភាពខាងក្រៅគួរឲ្យកត់សំគាល់នៅឡើយទេ។ ប៉ុន្តែលោកបន្ថែមថាបើតាមការស្រាវជ្រាវអត្រានៃការរួមភេទនៅថ្ងៃនៃក្ដីស្រលាញ់នេះមានការធ្លាក់ចុះតិចតួចបំផុត។
លោកបន្ថែមថា៖ “ឱកាសនៃការរួមភេទនៅថ្ងៃទី១៤កុម្ភៈមិនទាន់ធ្លាក់ចុះជាការកត់សំគាល់ទេគឺពី១២មក១១ភាគរយក្នុងចំនោមយុវជន៧១៥នាក់ដែលខ្ញុំធ្វើបទសំភាសន៍ក្នុងឆ្នាំ២០១៤កន្លងមក។ អញ្ចឹងចំណុចកន្លែងហ្នឹងនៅតែជាចំណុចសំខាន់ដែលគួរឲ្យកត់សំគាល់ដែលយើងគិតថានៅតែជាបញ្ហារបស់យុវជន”។
លោក តុង សុប្រាជ្ញ បន្ថែមថាការរួមភេទរបស់យុវវ័យនៅថ្ងៃទី១៤កុម្ភៈនេះអាចធ្វើការឲ្យមានការប៉ះពាល់ដល់អនាគតនិងការសិក្សាដោយសារការមានផ្ទៃពោះទាំងខ្លួននៅក្មេងនិងការឆ្លងជំងឺអេដស៍និងកាមរោគជាដើម។
លោកបន្ថែមថាដើម្បីទប់ស្កាត់នូវបញ្ហាទាំងនោះជារៀងរាល់ឆ្នាំក្រសួងអប់រំធ្វើការផ្សព្វផ្សាយអប់រំច្រើនតាមរយៈគ្រូបង្រៀនក៏ដូចជាកម្មវិធីសិក្សានៃបំណិនជីវិតជាដើម។ ចំណែកឱពុកម្ដាយក៏មានការយល់ដឹងក្នុងការទប់ស្កាត់ដោយមិនឲ្យកូនទៅរៀនចំថ្ងៃហ្នឹងឬក៏នាំកូនៗដើរលេងជាដើម៕
