ប្រធានាធិបតីសហរដ្ឋអាមេរិកលោក ត្រាំ កាលពីថ្ងៃពុធម្សិលមិញបានផ្ញើលិខិតមួយច្បាប់ទៅប្រធានាធិបតីចិនលោក ស៊ី ជីនពីង ដោយបញ្ជាក់ថា លោកចង់ពង្រឹងចំណងទាក់ទងគ្នា ដើម្បីអភិវឌ្ឍន៍ឲ្យផលប្រយោជន៍ដល់ប្រទេសទាំងពីរ។
នៅក្នុងលិខិតនោះ លោក ត្រាំ ក៏បានថ្លែងអំណរគុណ ដល់លោក ស៊ី ជីនពីង ដែលបានផ្ញើលិខិតអបអរសាទររូបលោក ពេលជាប់ឆ្នោតជាប្រធានាធិបតី ហើយលោក ត្រាំ ក៏បានជួនពរឲ្យពលរដ្ឋចិនមានការរីកចម្រើន។ នេះបើតាមទីភ្នាក់ងារព័ត៌មានរ៉យទ័រ។
ក្រសួងការបរទេសចិនមិនបានឆ្លើយតបភ្លាមទៅលោក ត្រាំ វិញទេ។
លោក ត្រាំ និង លោក ស៊ី មិនទាន់បាននិយាយគ្នាដោយផ្ទាល់ទេ ចាប់តាំងពីលោក ត្រាំ ចូលកាន់តំណែងកាលពីថ្ងៃទី២០ខែមករា ប៉ុន្តែពួកគេបានជជែកគ្នាក្រោយពេលដែលលោកត្រាំឈ្នះការបោះឆ្នោតកាលពីខែវិច្ឆិកា។
កាលពីសប្តាហ៍មុនក្រសួងការបរទេស ចិន បានថ្លែងថា ប្រទេសទាំងពីរ នៅតែមានទំនាក់ទំនងស្និទ្ធជាមួយគ្នាដដែល។
មួយរយៈកន្លងទៅនេះ សហរដ្ឋអាមេរិក និង ចិន បានប៉ះទង្គិចគ្នាជាបន្តបន្ទាប់ ជុំវិញបញ្ហានៅសមុទ្រចិន ការទំនាក់ទំនងអាមេរិក និង ដែនដីតៃវ៉ាន់ និង គោលនយោបាយទំនាក់ទំនងសេដ្ឋកិច្ចនៃប្រទេសទាំងពីរជាដើម៕