លោកនាយករដ្ឋមន្ត្រីហ៊ុន សែន បានប្រកាសប្រើកណ្តាប់ដៃដែក ដោយព្រមានដកតំណែងមន្ត្រីចាប់ពីថ្នាក់ស្រុក ដល់ថ្នាក់រដ្ឋមន្ត្រី ប្រសិនជាទប់ស្កាត់រថយន្តកែច្នៃ និងដឹកលើសទំងន់ចេញពីផ្លូវកម្ពុជាមិនបានទេ ដោយថា ដើម្បីការពារផលប្រយោជន៍របស់ប្រជាពលរដ្ឋ។
លោកហ៊ុន សែន ថ្លែងបែបនេះ ក្នុងពិធីសម្ពោធបើកការដ្ឋានសាងសង់ស្ពានបេតុងឆ្លងកាត់ទន្លេមេគង្គ ក្នុងស្រុកស្ទឹងត្រង់ ខេត្តកំពង់ចាមនៅព្រឹកថ្ងៃសុក្រនេះ ដោយបញ្ជាទៅក្រសួងមន្ទីរពាក់ព័ន្ឋនានា ជួបប្រជុំជាមួយម្ចាស់ ឬតំណាងក្រុមហ៊ុនដឹកជញ្ជូនទាំងអស់ដើម្បីបង្ហាញពីផលប៉ះពាល់ផ្លូវនិងស្ពាន ដោយសារតែរថយន្តកែច្នៃ និង ដឹកលើសទម្ងន់។
លោកទុកពេលត្រឹមម៉ោង១២ យប់នេះគឺគ្រប់ផ្លូវនៅទូទាំងប្រទេសកម្ពុជាគ្មានវត្តមានរថយន្តកែច្នែ និងដឹកលើសទំងន់នោះទេ ដោយលោកថាចាប់ពីម៉ោង១២ យប់នេះផ្លូវណាដែលនៅវត្តមានរថយន្តទាំងនោះធ្វើចរាចរណ៍ក្នុងក្រុង ស្រុក ខេត្តណានោះអភិបាលស្រុក និងខេត្តនោះគឺត្រូវទទួលខុសត្រូវចំពោះមុខលោក។
លោកថា៖ « បទបញ្ជានេះមិនត្រូវបានលើកលែង! ពីមុនធ្លាប់ដាក់ម្តងហើយប៉ុន្តែវារើឡើងវិញ ឥឡូវអត់ទេ! អត់មានរើរទេរដ្ឋមន្ត្រីក៏ត្រូវអស់តំណែង ចៅហ្វាយខេត្តចៅហ្វាយស្រុក កាត់នៅកន្លែងណា ចាប់នៅកន្លែងណា? យកបញ្ជូល អ្នកណាដោះលែងគឺអ្នកហ្នឹងមានទោស! និយាយគ្នាអញ្ចេសបានឆាប់ចប់។ ព្រោះបើមិននិយាយអញ្ចឹងវាមិនឆាប់ចប់ទេ » ។
នេះមិនមែនជាលើកទីមួយទេដែលលោកហ៊ុន សែន ប្រកាសប្រើកណ្តាប់ដៃដែករបស់លោកក្នុងការជំរុញការអនុវត្តន៍ច្បាប់នៅកម្ពុជានោះ ជាក់ស្តែងការប្រកាសប្រើកណ្តាប់ដៃដែកលើបទល្មើសគ្រឿងញៀន បទល្មើសព្រៃឈើ ទប់ស្កាត់ការលើកលែងទោសដល់អ្នកជួញដូរគ្រឿងញៀននិងប្លន់ ជាដើមសុទ្ធតែត្រូវបានលោកហ៊ុន សែន ប្រកាសរួចហើយ តែតាមការអង្កេតគឺកណ្តាប់ដៃដែកនោះហាក់មានទម្ងន់តែលើកដំបូង តែយូរទៅវាហាក់ស្រាលទៅៗរហូតបញ្ហានោះមួយចំនួននៅតែជាបញ្ហាដដែល។
នាយករងវិទ្យាស្ថានសុវត្ថិភាពចរាចរណ៍លោក គង់ រតនៈ បានសារទរចំពោះវិធានការនេះ តែលោកមានជំនឿថាយុទ្ធនាការនេះមានប្រសិទ្ធិភាពរយៈពេលខ្លីប៉ុណ្ណោះ និងពុំបានឆ្លើយតបចំពោះបញ្ហាដែលកំពុងកើតមានសព្វថ្ងៃនេះនោះទេ។ លោកឲ្យជាយោបល់ថា រដ្ឋាភិបាលគួរកំណត់ពីមូលហេតុដែលបណ្តាលឲ្យមានរថយន្តទាំងនោះសិន មុននឹងចេញដំណោះស្រាយ ក្នុងរយៈពេលមួយសមស្របចំពោះបញ្ហានេះ។
លោកថា៖ « ដំណោះស្រាយមិនមែនជាការប្រើកណ្តាប់ដៃដាក់ទៅលើពួកគាត់ទេ! តែជាការផ្តល់នូវជំរើសសម្រាប់ពួកគាត់វិញ។ ខ្ញុំគិតថាប្រសិនជាយើងចេញបញ្ជាតែមួយថ្ងៃពីរថ្ងៃអញ្ចឹង វាធ្វើឲ្យប៉ះពាល់ដល់សេដ្ឋកិច្ច វាធ្វើឲ្យប៉ះពាល់ដល់ទឹកចិត្តប្រជាពលរដ្ឋអីអញ្ចឹង។ អញ្ចឹងក្នុងនាមយើងជាអាណាព្យាបាល ជាអ្នកដោះស្រាយខ្ញុំគិតថាដំណោះស្រាយហ្នឹងគឺយើងគួរផ្តល់ជំរើសផ្សេងឲ្យគាត់ ទាក់ទងនឹងការដឹកលើសទំនិញឲ្យពួកគាត់ផ្តូរមកវិញ ឬក៏ឲ្យពួកគាត់កែច្នៃក្នុងរយៈពេលណា មានវិធានការសមស្របសំរាប់ពួកគាត់ទៅ។ ដូចដែលនិយាយថាយើងនិយាយភាសាខ្មែរដូចគ្នាហើយយើងគួរតែស្តាប់គ្នាបាន » ។
ក្រសួងសាធារណការ ធ្លាប់លើកឡើងថាកម្ពុជាត្រូវបង់ខាតលុយជាង២០០លានដុល្លាររាល់ឆ្នាំ ចំណាយលើការជួសជុលផ្លូវ ។ រដ្ឋមន្ត្រីក្រសួងសាធារណការ ក៏បានប្តេជ្ញាពង្រឹងគុណភាពផ្លូវថ្នល់មិនឲ្យធ្វើហើយឆាប់ខូចដូចមុននោះទេ។
