ប្រជាសហគមន៍បឹងកក់ជាង១០នាក់ នៅថ្ងៃទី៩ឧសភានេះ បានបន្តយកញត្តិដាក់នៅស្ថាប័នអន្តរជាតិមួយចំនួនក្នុងរាជធានីភ្នំពេញ ឲ្យជួយដាក់សម្ពាធទៅរដ្ឋាភិបាលកម្ពុជា ដើម្បីដោះលែងអ្នកស្រី ទេព វន្នី ឲ្យមានសេរីភាពវិញ ដោយថាស្រ្តីរូបនោះ មិនបានធ្វើខុសដូចការចោទប្រកាន់នោះទេ។
ស្ថាប័នអន្តរជាតិទំាងនោះរួមមាន UN ស្ថានទូតជប៉ុន សហគមន៍អឺរ៉ុប ខណៈស្ថាប័នចំនួន៣ទៀត គឺធនា គារពិភពលោក ទូតអាមេរិក និងទូតបារំាង ពួកគេថានឹងដាក់ក្រោយថ្ងៃបុណ្យវិសាខបូជា។
អ្នកស្រី ទេព វន្នី ត្រូវបានតុលាការកាត់ទោស ដាក់ពន្ធនាគារ២ឆ្នាំកន្លះ ពាក់ព័ន្ធការប្រើអំពើហិង្សាលើសន្តិសុខខណ្ឌដូនពេញ ចំនួនពីរនាក់ឲ្យរងរបួស នៅខាងកើតផ្ទះលោកនាយករដ្ឋមន្ត្រី ហ៊ុន សែន។
បន្ទាប់ពីយកញត្តិនៅស្ថានទូតចំនួន៣ខាងលើ តំណាងសហគមន៍បឹង អ្នកស្រី ប៊ូវ សោភា បានអះអាងថា មន្ត្រីស្ថានទូតទំាងនោះ បានទទួលយកញត្តិពួកគេ ដោយសន្យាប្រហាក់ប្រហែលគ្នាថានឹងបញ្ជូនទៅថ្នាក់លើពិនិត្យ និងដោះស្រាយតាមនីតិវិធីជាមួយលោកនាយករដ្ឋមន្ត្រី ហ៊ុន សែន។
តំណាងសហគមន៍បឹងកក់ អ្នកស្រី ប៊ូវ សោភា បានបញ្ជាក់ថា ដើមចមដែលនាំឲ្យពួកគេយកញត្តិដាក់ទៅស្ថាប័នអន្តរជាតិ ដោយថាពួកគេអស់ជំនឿលើការដឹកនាំរបស់រដ្ឋាភិបាល ក្នុងការជួយដោះស្រាយបញ្ហាប្រឈមជូនប្រជាពលរដ្ឋដែលរងគ្រោះ ដោយភាពអយុត្តិធម៌ ជាពិសេស ករណីអ្នកស្រី ទេព វន្នី។
អ្នកស្រីនិយាយថា «ខ្ញុំក៏សូមទោសដែរ ដែលបងប្អូនមួយចំនួនដែលគិតថា ហេតុអ្វីបានជាពួកខ្ញុំអត់ទៅរក ស្ថាប័នរដ្ឋ សូម្បីតែឥឡូវហ៊ានតែឈានជើងទៅមុខផ្ទះសម្តេច[លោកនាយករដ្ឋមន្ត្រីហ៊ុន សែន]តែមួយចំហ៊ាន នឹងដាច់ជើងមួយកំណាត់ បើឈានជើងឆ្វេង ដាច់ឈើងឆ្វេង ឈានឈើងស្តំា ដាច់ឈើងស្តំាសួរថា ពួកខ្ញុំអាចមានលទ្ធភាពអត់ ដែលក្នុងនាមជាថ្នាក់ដឹកនាំគាត់អត់ដែលបានមកមើលគិតពួកខ្ញុំ»។
ប្រជាសហគមន៍បឹងកក់ម្នាក់ទៀត អ្នកនាង សុង ស្រីលាភ បានថ្លែងប្រាប់អ្នកសារព័ត៌មាននៅមុខ សហគមន៍អឺរ៉ុបថា សំណុំរឿងអ្នកស្រីទេព វន្នី មានតែស្ថាប័នអន្តរជាតិដែលជាម្ចាស់ជំនួយផ្តល់មកកម្ពុជាទេ ដែលអាចជួយដាក់សម្ពាធទៅរដ្ឋាភិបាលលោក ហ៊ុន សែន ឲ្យជួយអន្តរាគមន៍ទៅស្ថាប័នពាក់ព័ន្ធដោះលែងអ្នកស្រី ទេព វន្នី បាន។
អ្នកស្រីនិយាយថា «សគមន៍អឺរ៉ុបក៏ជាម្ចាស់ជំនួយដ៏ធំនៅក្នុងប្រទេសកម្ពុជា រាល់ឆ្នាំគឺគាត់បានផ្តល់លុយរាប់រយលាន[ដុល្លារ]ដល់រាជរដ្ឋាភិបាលខ្មែរយើង ហើយខ្ញុំជឿជាក់ថា គាត់គឺជាម្ចាស់ជំនួយដ៏ធំសម្រាប់រាជរដ្ឋាភិបាល គាត់នឹងមានទឹកមាត់ប្រៃ ឬក៏ឥទ្ធិពលក្នុងការនិយាយជាមួយរាជរដ្ឋាភិបាលខ្មែរយើង ក្នុងការផ្តល់យុត្តិធម៌សម្រាប់អ្នកស្រី ទេព វន្នី ហើយជាពិសេសនោះក្នុងការលើកកម្ពស់ សិទ្ធិសេរីភាពនៃការតស៊ូមតិ និងសិទ្ធិសេរីភាពក្នុងការជួបជុំ»។
កាលពីថ្ងៃចន្ទទី៨ ខែឧសភា ម្សិលមិញ ប្រជាសហគមន៍បឹងកក់ ក៏បានដាក់ញ្ញត្តិទៅក្រសួងយុត្តិធម៌ ដើម្បីស្នើទៅរដ្ឋមន្ត្រីស្ថាប័ននេះ ជួយអន្តរាគមន៍ទៅស្ថាប័នពាក់ព័ន្ធដោះលែងអ្នកស្រីទេព វន្នី ដែរ ប៉ុន្តែមិនទាន់មានការឆ្លើយតបនៅឡើយ។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត យល់ថា បើរដ្ឋាភិបាលមិនធ្វើការដោះលែងសកម្មជនដីធ្លី មន្ត្រីសិទ្ធិមនុស្សទេ នឹងធ្វើឲ្យប៉ះពាល់ដល់មុខមាត់រដ្ឋាភិបាល និងកម្ពុជាខាតប្រយោជន៍ច្រើនពីសហគមន៍អន្តរជាតិ។
លោកនិយាយថា៖ «យើងឃើញថ្មីៗនេះ ទំាងអង្គការសហប្រជាជាតិ ទំាងសហគមន៍អឺរ៉ុប និងសហរដ្ឋអាមេរិកគេបានទទូច ឬក៏គេបានថ្កោលទោសទាក់ទងការឃុំខ្លួនសកម្មជនការពារសិទ្ធិមនុស្ស ហើយនឹងទទូចឲ្យមានការដោះលែងផងដែរ ហើយប្រសិនជាលោកមិនពិចារណាទេ ការរិះគន់របស់គេ [សហគមន៍អន្តរជាតិ]នៅមានបន្តបន្ទាប់ទៀត ហើយសហគមន៍អឺរ៉ុប គេពិចារណាទាក់ទងនឹងការផ្អាកផ្តល់ជំនួយ ក្នុងការអភិវឌ្ឍដូចសហរដ្ឋអាមេរិក កាលណាក្នុងការផ្អាកជំនួយសម្រាប់កម្ពុជា សុទ្ធតែពាក់ព័ន្ធនឹងសិទ្ធិមនុស្សនៅកម្ពុជា»។
ទោះជាយ៉ាងណា VOD មិនអាចសុំការបំភ្លឺពីអ្នកនាំពាក្យប្រតិកម្មរហ័ស ទីស្តីការគណៈរដ្ឋមន្រ្តីលោក ផៃ ស៊ីផាន លោក កែវ រ៉េមី និងលោក ទិត សុធា បានទេនៅថ្ងៃនេះ។
កាលពីចុងខែកុម្ភៈឆ្នាំ២០១៧ អ្នកស្រី ទេព វន្នី ត្រូវបានសាលាដំបូងរាជធានីភ្នំពេញកាត់ទោស ដោយដាក់ពន្ធនាគារចំនួន២ឆ្នាំកន្លះ ពាក់ព័ន្ធការប្រើអំពើហិង្សាលើសន្តិសុខខណ្ឌដូនពេញពីរនាក់ឲ្យរងរបួស កាលពីថ្ងៃទី១៣ខែមីនាឆ្នាំ២០១៣។ ស្រ្តីសកម្មជនដីធ្លីរូបនេះ ត្រូវបានអាជ្ញាធរចាប់បញ្ជូនទៅឲ្យតុលាការកាត់ទោស៣ដងរួចហើយ។ ករណីនេះ ក្រុមសកម្មជនដីធ្លីនិងអង្គការសិទ្ធិមុស្ស ចាត់ទុកសាលក្រមនោះថា មិនមានយុត្តិធម៌៕
