នាយករដ្ឋមន្ត្រីឥណ្ឌាលោក ណារ៉េនដ្រា ម៉ូឌី បានប្រកាសកាលពីថ្ងៃម្សិលមិញថា ឥណ្ឌានិងសហរដ្ឋអាមេរិក គួរធ្វើការរួមគ្នាឲ្យបានជិតស្និទ្ធថែមទៀត ដើម្បីផ្ចាញ់ចលនាភេរវកម្មនិងកាត់ផ្ដាច់អស្ថេរភាពតំបន់។
ខណៈដែលមេដឹកនាំឥណ្ឌាមិនបានបញ្ជាក់ពីឈ្មោះប្រទេសប៉ាគីស្ថាន លោក ម៉ូឌី បានជំរុញឲ្យសមាជិកសភាអាមេរិកជួយហ៊ុមព័ទ្ធអ្នកទាំងឡាយដែលគាំទ្រចលនាភេរវកម្មនៅបណ្ដាប្រទេសជិតខាងឥណ្ឌា។
ដោយមិនបានលើកឡើងពីមហិច្ឆិតាចិននៅក្នុងជម្លោះដែនទឹក លោក ម៉ូឌី បាននិយាយថាភាពជាដៃគូអាមេរិក-ឥណ្ឌានឹងជួយធានាសន្តិសុខនៃផ្លូវពាណិជ្ជកម្មនិងសេរីភាពនាវាចរណ៍នៅដែនសមុទ្រ។
លោក ម៉ូឌី បានថ្លែងដូច្នេះនៅក្នុងសម័យប្រជុំមួយរបស់សភាអាមេរិកនៅអំឡុងដំណើរទស្សនកិច្ចទៅកាន់ក្រុងវ៉ាស៊ីងតោនដែលរៀបចំឡើងដើម្បីកសាងទំនាក់ទំនងរវាងមហាអំណាចប្រជាធិបតេយ្យទាំងពីរនេះ៕