សមត្ថកិច្ចអះអាងថាមនុស្សពីរនាក់ស្លាប់ក្នុងហេតុការណ៍លិចទូកដនៅស្រុកល្វាឯម ខេត្តកណ្តាល ដោយសារខ្យល់កន្ត្រាក់ខ្លាំងកាលពីរសៀលថ្ងៃពុធ។
កាលពីយប់ថ្ងៃពុធ សមត្ថកិច្ចបានឲ្យដឹងថាមនុស្សមួយនាក់ស្លាប់និងពីរបីនាក់ទៀតបាត់ខ្លួន។ នៅព្រឹកថ្ងៃព្រហស្បតិ៍នេះ ស្នងការរងខេត្តកណ្តាល លោក វ៉ែន សុវិន ប្រាប់វីអូឌីថារហូតមកដល់ពេលនេះ មនុស្សពីរនាក់ស្លាប់ ក្នុងនោះម្នាក់អាយុ៦១ឆ្នាំនិងក្មេងអាយុ២ឆ្នាំ ស្លាប់តែមិនទាន់រកឃើញសាកសពនៅឡើយទេ។ លោកបន្តថានៅលើទូកដនោះមានមនុស្ស៨នាក់ដែលក្នុងនោះ៦នាក់បានហែលចេញពីទូកនិងត្រូវបានជួយសង្រ្គោះ។
លោកបញ្ជាក់ថាសមត្ថកិច្ចកំពុងតែតាមចាប់អ្នកបញ្ជាទូក ដោយលោកថាឧបទ្ទវហេតុនេះអាចមកពីការធ្វេសប្រហែសរបស់អ្នកបញ្ជាទូក។ លោកឲ្យដឹងទៀតថាតាមរបាយការណ៍ ទូកដនោះដឹកម៉ូតូចំនួន៤គ្រឿង។
សមត្ថកិច្ចឲ្យដឹងថាទូកនោះដឹកអ្នកដំណើរឆ្លងកំពង់ដពីកោះកែវទៅសំរោងធំ ស្រុកកៀនស្វាយ ហើយបានក្រឡាប់លិចចាក់អ្នកធ្វើដំណើរ។ ហេតុការណ៍នេះកើតឡើងនៅវេលាម៉ោង១និង៣០នាទី នៅភូមិកោះកែវ ឃុំកោះកែវ ខណៈពេលដែលមានភ្លៀងខ្លាំងនិងមានខ្យល់កន្ត្រាក់៕