សាលាដំបូងរាជធានីភ្នំពេញ បានសម្រេចចោទប្រកាន់ អ្នកការសែតជនជាតិអូស្ត្រាលីម្នាក់ ទាក់ទងទៅនឹងការសង្ស័យថាបានចូលមកលួចព័ត៌មានពីប្រទេសកម្ពុជា។
ស្នងការរងនគរបាលរាជធានីភ្នំពេញលោក លូ រ៉ាបូ មានប្រសាសន៍ប្រាប់វីអូឌីកាលពីថ្ងៃទី០៥មិថុនាថា កាលពីថ្ងៃទី៣មិថុនា អាជ្ញាធរបានឃាត់ខ្លួនអ្នកកាសែតជនជាតិអូស្ត្រាលីម្នាក់ឈ្មោះ Jame Ricketson អាយុ៦៨ឆ្នាំ នៅសួនមាត់ទន្លេ មុខព្រះបរមរាជវាំង បន្ទាប់ពីមានការសង្ស័យទៅលើអ្នកការសែតរូបនេះថាបានចូលមករស់នៅខុសច្បាប់នៅកម្ពុជា។
លោកថា៖ «ឃាត់នៅមាត់ទន្លេ។ យើងត្រួតពិនិត្យធម្មតាហ្នឹងណា ឃើញជនបរទេស គួរឲ្យសង្ស័យយើងសួរនាំគាត់រកមើលលិខិតស្នាមអីអញ្ចឹងទៅគាត់វាអត់មាន ហើយសួរគាត់រកលិខិតស្នាមថា រស់ឯណាអញ្ចឹងទៅ គាត់អត់ឆ្លើយតបទាំងអស់ អត់សហការអញ្ចឹង មានតែគាត់លួចនៅស្រុកខ្មែរខុសច្បាប់បើគាត់អត់មានលិខិតស្នាមផង »។
ទោះជាយ៉ាងណា ក្រោយពីបានបញ្ជូនទៅតុលាការនៅថ្ងៃនេះ អ្នកនាំពាក្យសាលាដំបូងរាជធានីភ្នំពេញលោក លី សុផាណា បានឲ្យអ្នកសារព័ត៌មានតាមសារអេឡិចត្រូនិចតេលេក្រាមថា ព្រះរាជអាជ្ញាអមសាលាដំបូងរាជធានីភ្នំពេញលោក សៀង សុខ បានសម្រេចចោទប្រកាន់អ្នកកាសែតជនជាតិអូស្ត្រាលីម្នាក់នេះ ពីបទប្រមូលព័ត៌មាន ដែលអាចធ្វើឲ្យអន្តរាយការការពារជាតិ តាមមាត្រា៤៤៦ នៃក្រមព្រហ្មទណ្ឌ នឹងបានបញ្ជូនសុំណុំរឿងនេះ ទៅកាន់ចៅក្រមស៊ើបសួរដើម្បីចាត់ការបន្ត។
បើតាមមាត្រា៤៤៦ នៃក្រមព្រហ្មទណ្ឌ លោក Ricketson អាចប្រឈមនឹងទោសជាប់ពន្ធនាគារពី៥ ទៅ១០ឆ្នាំ។
វីអូឌី នៅមិនទាន់អាចទាក់ទងស្ថានទូតអូស្ត្រាលី ដើម្បីសុំប្រតិកម្មពីការចាប់ខ្លួនជនជាតិខ្លួននេះ បាននៅឡើយទេ។
គួរបញ្ជាក់ផងដែរថា លោក Jame Ricketson គឺជាផលិតករភាពយន្តជនជាតិអូស្ត្រាលី ដែលភាពយន្តរបស់គាត់ភាគច្រើនជាប្រភេទបទយកការណ៍ និងជាភាពយន្តឯកសារ។ កាលពីឆ្នា២០១៤លោកធ្លាប់ត្រូវបានតុលាការកម្ពុជាកាត់ទោសម្តងហើយដោយដាក់ពន្ធនាគារចំនួនពីរឆ្នាំពីបទបង្ខូចកេ្ករ៍ ពាក់ព័ន្ធនឹងការគំរាមផ្សព្វផ្សាយថាវិហារ Citipointe បានធ្វើអាជីវកម្មលក់កូនក្មេង៕
