មេដឹកនាំគណបក្សប្រឆាំង លោក សម រង្ស៊ី ដែលកំពុងនិរទេសខ្លួនឯងនៅឯបរទេសនោះ បានអះអាងថា តុលាការនៅប្រទេសបារាំង បានសម្រេចឲ្យលោកឈ្នះក្ដីជាថ្មីម្ដងទៀត នៅក្នុងបណ្ដឹងបរិហារកេរ្តិ៍ ដែលប្ដឹងដោយអតីតរដ្ឋមន្ត្រីការបរទេសកម្ពុជា លោក ហោ ណាំហុង។
លោក សម រង្ស៊ី បានប្រកាសតាមទំព័រហ្វេសប៊ុករបស់លោកថា តុលាការនៅប្រទេសបារាំង បានកាត់ក្តីឲ្យលោក ហោ ណាំហុង ចាញ់លោកម្តងទៀតកាលពីថ្ងៃទី០៨ ខែកក្កដា ឆ្នាំ២០១៦ ក្នុងបណ្តឹងបរិហារកេរ្តិ៍ ដែលអតីតរដ្ឋមន្ត្រីក្រសួងការបរទេសកម្ពុជា បានប្ដឹងប្រឆាំងលោក សម រង្ស៊ី។
លោក សម រង្ស៊ី ត្រូវបានលោក ហោ ណាំហុង ប្ដឹងពីបទបរិហារកេរ្តិ៍ ក្រោយពីលោកបាននិយាយថា អតីតរដ្ឋមន្ត្រីការបរទេសរូបនេះ គឺជាអ្នកទទួលខុសត្រូវនៅជំរុំបឹងត្របែក នៅក្នុងរបបកម្ពុជាប្រជាធិបតេយ្យ។
ទោះជាយ៉ាងណា លោក ហោ ណាំងហុង បានច្រានចោលការចោទប្រកាន់នេះ ដោយលោកអះអាងថា លោក និងសាច់ញាតិរបស់លោក ក៏ជាជនរងគ្រោះក្នុងរបបខ្មែរក្រហមផងដែរ៕
