មន្ត្រីយោធាកូរ៉េខាងត្បូង បានអះអាងថា កូរ៉េខាងជើងបានបាញ់មីស៊ីលរយៈចម្ងាយមធ្យមចេញពីនាវាមុជទឹកនៅព្រឹកថ្ងៃសៅរ៍នេះ។
ទីភ្នាក់ងារព័ត៌មានរ៉យទ័រ បានដកស្រង់សម្ដីអគ្គមេបញ្ជាកាកងទ័ពកូរ៉េខាងត្បូង ដែលបាននិយាយនៅក្នុងសេចក្ដីប្រកាសព័ត៌មានមួយថា គ្រាប់មីស៊ីលនោះ ត្រូវបានបាញ់នៅម៉ោងប្រហែល ១១កន្លះ ម៉ោងនៅទីក្រុងសេអ៊ូល ចេញពីទឹកស្ថិតនៅឆ្នេរភាគខាងកើតនៃឧបទ្វីបកូរ៉េ។
នេះគឺជាការបាញ់សាកល្បងថ្មីបំផុតធ្វើឡើងដោយក្រុងព្យុងយ៉ាង ដែលបំពានទៅលើសេចក្ដីសម្រេចរបស់អង្គការសហប្រជាជាតិ។
កូរ៉េខាងជើង ដែលកំពុងផលិតអាវុធនុយក្លេអ៊ែរនោះ ត្រូវបានអង្គការសហប្រជាជាតិចេញសេចក្ដីសម្រេចហាមឃាត់ មិនឲ្យប្រើប្រាស់បច្ចេកវិទ្យាមីស៊ីលបាលីស្ទីកនោះឡើយ។
ការបាញ់គ្រាប់មីស៊ីលរបស់ក្រុងព្យុងយ៉ាង ធ្វើឡើងតែមួយថ្ងៃក្រោយពីក្រុងវ៉ាស៊ីងតោន និងក្រុងសេអ៊ូល បានឯកភាពគ្នាដាក់ពង្រាយប្រព័ន្ធខែលការពារមីស៊ីល ដើម្បីទប់ទល់នឹងការគំរាមកំហែងពីក្រុងព្យុងយ៉ាង៕