កម្មការិនី៤នាក់បានរងរបួសធ្ងន់និង៨នាក់ទៀតបានរងរបួសស្រាល បន្ទាប់ពីរថយន្តដឹកកម្មករ២គ្រឿងបានបុកគ្នានៅឯក្រុងបាវិត ខេត្តស្វាយរៀង កាលពីល្ងាចថ្ងៃម្សិលមិញ។ នេះដោយយោងតាមសេចក្ដីប្រកាសរបស់ក្រសួងការងារកម្ពុជាចេញផ្សាយនៅថ្ងៃនេះ។
ក្រសួងការងារបាននិយាយក្នុងសេចក្ដីប្រកាសព័ត៌មាននោះថា រថយន្តដឹកកម្មករចំនួន២គ្រឿងបានបុកគ្នាពីក្រោយ កាលពីម៉ោងជាង៥ល្ងាចថ្ងៃម្សិលមិញ នៅភូមិថ្នល់ជាតិ សង្កាត់ច្រកម្ទេស ដោយបានបណ្ដាលឲ្យកម្មករចំនួន១២នាក់បានរងរបួស ក្នុងនោះ៤នាក់បានរងរបួសធ្ងន់។
ក្រសួងការងារបានបង្ហាញក្ដីរន្ធត់និងសោកស្ដាយចំពោះគ្រោះថ្នាក់នោះ ហើយនិយាយថាកម្មកររងរបួសត្រូវបានបញ្ជូនទៅអាជ្ញាធរមូលដ្ឋានជួយសង្គ្រោះនិងមន្ត្រីបេឡាជាតិរបបសន្តិសុខសង្គម។
ទោះជាយ៉ាងណា ក្រសួងបានបញ្ជាក់ថាកម្មកររងរបួសទាំងនោះបានវិលត្រឡប់ទៅធ្វើការធម្មតាវិញហើយនៅថ្ងៃអង្គារនេះ។
ក្រសួងការងារនៅថ្ងៃនេះក៏បានប្រកាសផងដែរថា កម្មការិនីម្នាក់បានស្លាប់ ហើយកម្មករ១៣នាក់ទៀតបានរងរបួសធ្ងន់ស្រាល បន្ទាប់ពីរថយន្តដឹកកម្មករមួយគ្រឿងបានក្រឡាប់ធ្លាក់ពីផ្លូវនៅព្រឹកព្រលឹមថ្ងៃអង្គារនេះនៅឯស្រុករលាប្អៀរ ខេត្តកំពង់ឆ្នាំង។
កាលពីសប្ដាហ៍មុន កម្មករចំនួន៣៣នាក់បានរងរបួសធ្ងន់ស្រាល បន្ទាប់ពីរថយន្តដឹកកម្មករមួយគ្រឿងបានក្រឡាប់នៅខេត្តកំពង់ស្ពឺកាលពីថ្ងៃពុធសប្ដាហ៍មុន៕