អង្គការឃ្លាំមើលការបោះឆ្នោតមួយហៅខុមហ្វ្រែលបានបើកវគ្គបណ្តុះបណ្តាលគ្រូបង្គោលសម្រាប់ចូលរួមសង្កេតការណ៍ពីដំណើរការបោះឆ្នោត ខណៈគណៈកម្មាធិការជាតិរៀបចំការបោះឆ្នោត (គ.ជ.ប) ត្រៀមចុះធ្វើបញ្ជីឈ្មោះអ្នកបោះឆ្នោតថ្មីនៅដើមខែក្រោយនេះ។
ការបោះឆ្នោតឃុំ-សង្កាត់នឹងប្រព្រឹតិ្តទៅនៅថ្ងៃទី៤ ខែមិថុនា ឆ្នាំ២០១៧ ចំណែកឯការចុះឈ្មោះបោះឆ្នោតវិញ គ.ជ.ប ប្រើរយៈពេល៩០ថ្ងៃ សម្រាប់ចុះធ្វើបញ្ជីបោះឆ្នោតថ្មីចាប់ពីថ្ងៃទី១ខែកញ្ញារហូតថ្ងៃទី២៩ ខែវិច្ឆិកា ឆ្នាំ២០១៦។
ក្នុងវគ្គបណ្តុះបណ្តាលនៅស្នាក់ការខុមហ្វ្រែលរាជធានីភ្នំពេញ មន្ត្រីកម្មវិធីជាន់ខ្ពស់ផ្នែកអង្កេតលោក កន សាវាង្ស បានលើកឡើងថា ដំណើរការចុះឈ្មោះបោះឆ្នោតកន្លងទៅមានភាពមិនប្រក្រតីច្រើន ធ្វើឲ្យពលរដ្ឋខ្លះបាត់ឈ្មោះ ខ្លះទៀតមានឈ្មោះស្នួនឬទ្រួតស៊ីគ្នា អ្នកខ្លះទៀតរកមណ្ឌលបោះឆ្នោតមិនឃើញនៅថ្ងៃបោះឆ្នោតជាដើម។
លោក កន សាវាង្ស គិតថាវគ្គបណ្តុះបណ្តាលគ្រូបង្គោលចំនួន២០នាក់ នៅថ្ងៃទី៩ខែសីហានេះ លោកថាពួកគេអាចទៅបង្រៀនអ្នកស្ម័គ្រចិត្តច្រើនទៀត ដែលមានបំនងចង់ចូលរួមសង្កេតការណ៍ក្នុងដំណើរការបោះឆ្នោតនៅពេលខាងមុខនេះ។
មន្ត្រីសង្គមស៊ីវិលរូបនោះគិតថា ការដែលអ្នកសង្កេតការណ៍ដឹងច្បាប់ពីនីតិវិធីនៃការចុះឈ្មោះបោះឆ្នោតឬដំណើការបោះឆ្នោត លោកថាជាការចូលរួមមួយចំណែកក្នុងការកាត់បន្ថយភាពចម្រូងចម្រាសនៃដំណើរការបោះឆ្នោត ។
បើតាមលោក កន សាវាង្ស បច្ចុប្បន្នខុមហ្វ្រែលមានអ្នកអង្គេតការណ៍គ្រប់ដណ្តប់៦០០ឃុំ លោកថាខុមហ្វ្រែលរំពឹងថាចំនួននេះអាចនឹងលើសពី១២០០នាក់បន្ថែមទៀតមកពីដៃគូពាក់ព័ន្ធ សម្រាប់ដាក់ពង្រាយតាមឃុំ-សង្កាត់ទាំង១៦៣៣ឃុំ-សង្កាត់ ដើម្បីអង្កេតការណ៍បោះឆ្នោតឆ្នាំ២០១៧។
គ.ជ.ប រំពឹងថាការបោះឆ្នោតឃុំ-សង្កាត់ឆ្នាំ២០១៧ នឹងមានពលរដ្ឋជាង៩លាន៦សែននាក់ (៩ ៦៦៤ ២១៦) ចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់នៅឆ្នាំ២០១៧ខាងមុខ ក្នុងចំណោមពលរដ្ឋខ្មែរសរុបជាង១៥លាននាក់ (១៥ ៧២១ ៣៥៦)៕