រដ្ឋាភិបាលអូស្ត្រាលីកំពុងរៀបចំធ្វើការស្ទង់មតិពីការរៀបការជាមួយមនុស្សភេទដូចគ្នា ឲ្យមានភាពស្របច្បាប់ បន្ទាប់ពីសេចក្តីស្នើឡើងត្រូវព្រឹទ្ធសភាបានច្រានចោល។
ការរៀបការជាមួយមនុស្សដែលមានភេទដូចគ្នា ច្បាប់របស់ប្រទេសអូស្ត្រាលីមិនបានទទួលស្គាល់នោះទេ ទើបរដ្ឋាភិបាលបច្ចុប្បន្នចង់រៀបចំឲ្យមានការទទួលស្គាល់ដោយផ្លូវច្បាប់ ប៉ុន្តែនៅមានការជំទាស់។
ប្រសិនជាការស្ទង់មតិមហាជនបង្ហាញថា មានការគាំទ្រច្រើនចំពោះការរៀបការរបស់មនុស្សភេទដូចគ្នានោះ អាពាហ៍ពិពាហ៍ក្រុមនេះ មិនខុសច្បាប់ទៀតទេ។ នេះបើតាមសារព័ត៌មាន BBC។
ទោះយ៉ាងណា នាយករដ្ឋមន្ត្រី Malcolm Turnbull ថ្លែងថា សភាកំពុងពិនិត្យក្នុងការបោះឆ្នោតឲ្យមានភាពស្របច្បាប់នៃការរៀបការជាមួយមនុស្សមានភេទដូចគ្នាឲ្យបាននៅឆ្នាំនេះ។
ចំណែកក្រុមប្រឆាំងបានលើកឡើងថា ការរៀបចំច្បាប់រៀបការភេទដូចគ្នានេះ មិនសំខាន់ដែលត្រូវធ្វើបន្ទាន់នោះទេ ខណៈមានបញ្ហាផ្សេងៗច្រើនទៀតដែលសភាត្រូវធ្វើ។ ម្យ៉ាងការរៀបចំច្បាប់ឲ្យរៀបការភេទដូចគ្នានេះ ក៏ប្រឈមនិងរដ្ឋធម្មនុញ្ញរបស់ប្រទេសនេះផងដែរ៕