លោក កឹម សុខា ប្រធានស្តីទីគណបក្សសង្គ្រោះជាតិដែលកំពុងប្រឈមការចាប់ខ្លួន ថ្លែងប្រាប់អ្នកគាំទ្រជាសាធារណៈនៅព្រឹកនេះថា លោកសុខចិត្តឲ្យខ្លួនឯងរងគ្រោះថ្នាក់តែមិនបណ្តោយឲ្យជាតិនិងប្រជាជនមានគ្រោះថ្នាក់ទេ។
លោក កឹម សុខា ថ្លែងប្រាប់អ្នកគាំទ្រនៅស្នាក់ការគណបក្សសង្គ្រោះជាតិនៅព្រឹកថ្ងៃសុក្រនេះថា គណបក្សកាន់អំណាចបានប្រើគ្រប់មធ្យោបាយគំរាមកំហែងនិងតាមចាប់ខ្លួនរូបលោកដាក់ពន្ធនាគារនិងប៉ុនប៉ងផ្តាច់ជីវិតរូបលោក៖ «ការលះបង់របស់ខ្ញុំប្រឈមគ្រោះថ្នាក់ជាច្រើន ដូចជាការគំរាមកំហែង បំភិតបំភ័យ មូលបង្កាច់ ចាប់ដាក់គុក ប៉ុនប៉ងសម្លាប់ផ្តាច់អាយុជីវិតខ្ញុំជាច្រើនដងមកហើយ។ ប៉ុន្តែខ្ញុំនៅតែតស៊ូរក្សាគោលជំហរដដែល ដោយខ្ញុំយល់ឃើញថា ខ្ញុំអាចគ្រោះថ្នាក់ តែមិនចង់ឃើញជាតិនិងប្រជាពលរដ្ឋខ្មែរគ្រោះថ្នាក់ឡើយ»។
សាលាដំបូងរាជធានីភ្នំពេញបានបើកសវនាការលើករណីលោក កឹម សុខា នៅព្រឹកថ្ងៃសុក្រនេះ តែលោក កឹម សុខា និងមេធាវីរបស់លោកមិនចូលរួមសវនាការទេ។ ទោះយ៉ាងណា ក្រោយការបើកសវនាការដែលមិនមានការចូលរួមពីជនជាប់ចោទនិងមេធាវីនៅព្រឹកនេះ ចៅក្រមប្រកាសថាសាលក្រមនឹងប្រកាសនៅម៉ោង២រសៀល៕ ដោយលោក ហ៊ុន ឌីម៉ូ
