អនុប្រធានគណបក្សសង្គ្រោះជាតិលោកស្រីមូរ សុខហួរ ថ្លែងថា គណបក្សកាន់អំណាចអាចរំលាយគណបក្សប្រឆាំងរបស់លោកស្រី បានគ្រប់ពេលវេលា ប៉ុន្តែលោកស្រីចោទជា សំនួរថា តើក្រោយពីរំលាយបក្សនេះហើយ តើអាចរំលាយអារម្មណ៍ពលរដ្ឋបានទេ។
លោកស្រី មូរ សុខហួរ បានសរសេរនៅលើហ្វេសប៊ុកផ្ទាល់ខ្លួនភ្ជាប់ជាមួយ បទសម្ភាសន៍របស់លោកស្រី ជាមួយកាសែតភ្នំពេញប៉ុស្តិ៍ដោយលើកឡើងថា ស្ថានភាពបក្សប្រឆាំងពេលនេះ អាចប្រឈមនឹងការរំលាយគ្រប់ពេលវេលា។ លោកស្រីថា គណបក្សប្រឆាំងបច្ចុប្បន្នតំណាងឲ្យពលរដ្ឋប្រមាណ៣លាននាក់ ដែលមិនអាចរំលាយអារម្មណ៍របស់ពួកគេបានទេ។
លោកស្រីសរសេរថា ៖«ចង់រំលាយគណបក្សសង្គ្រោះជាតិនៅពេលណាក៏បានដែរ តែខ្ញុំសួរវិញ!!! អ្នកបោះឆ្នោតឲ្យសង្គ្រោះជាតិជាង ៣លាននាក់ តើរំលាយអារម្មណ៍ រំលាយសម្បជញ្ញៈ រំលាយការឈឺចាប់របស់ប្រជាពលរដ្ឋជាង ៣លាន នាក់បានទេ?»
លោកស្រី មូរ សុខហួរ ថ្លែងទៀតថា បើសិនជាគណបក្សកាន់អំណាចមិនចង់ឲ្យពលរដ្ឋបោះឆ្នោតឲ្យគណបក្សប្រឆាំងនោះ គឺគណបក្សកាន់អំណាចត្រូវព្យាយាមដោះស្រាយបញ្ហាដែលពលរដ្ឋកំពុងជួបប្រទះទៅ។ លោកស្រីជំរុញឲ្យ ប្រើវិធីសាស្ត្រដោះស្រាយបញ្ហាពលរដ្ឋដើម្បីដណ្តើមប្រជាប្រិយភាពនេះ គឺបានផលច្រើនសម្រាប់ជាតិនិង ប្រជាពលរដ្ឋ។
ក្រោយការចាប់ខ្លួនប្រធានគណបក្សសង្គ្រោះជាតិលោក កឹម សុខា កាលពីចុងសប្តាហ៍មុននោះ មន្ត្រីជាន់ខ្ពស់គណបក្សប្រជាជនកម្ពុជា បានលើកឡើងជាបន្តបន្ទាប់ថា គណបក្សសង្គ្រោះជាតិអាចប្រឈមនឹងការរំលាយចោល បើសិនជាមិនព្រមជ្រើសរើសតំណាងថ្មីតាមការតម្រូវរបស់ច្បាប់។