រដ្ឋាភិបាលបានឲ្យដឹងថា អង្គការសមាគម ដែលកំពុងធ្វើសកម្មភាពក្នុងប្រទេសកម្ពុជា ហើយមានបំណងបើកសាខាបន្ថែម ត្រូវជូនដំណឹង ជាលាយលក្ខណ៍អក្សរទៅក្រសួងមហាផ្ទៃ ឬស្ថាប័នពាក់ព័ន្ធ មុនអនុវត្តការងាររបស់ខ្លួន ដោយថា ដើម្បីឲ្យស្របតាមច្បាប់ សមាគម និងអង្គការមិនមែនរដ្ឋាភិបាល។
ក្នុងលិខិតរបស់ក្រសួងមហាផ្ទៃចុះថ្ងៃទី២តុលា ដែល VOD ទើបទទួលបាននៅថ្ងៃទី៩ខែតុលានេះ មានខ្លឹមសារថា សមាគម និងអង្គការមិនមែនរដ្ឋាភិបាលក្នុងស្រុក ដែលបានចុះបញ្ជីត្រឹមត្រូវតាមច្បាប់កំណត់ ហើយមានបំណងធ្វើសកម្មភាព នៅក្នុងដែនសមត្ថកិច្ចរដ្ឋបាលរាជធានី ខេត្តណាមួយ អាចជូនដំណឹងដោយផ្ទាល់ជាលាយលក្ខណ៍អក្សរក្នុងរយៈពេល៣ថ្ងៃ និងភ្ជាប់នូវគម្រោងសកម្មភាពរបស់ខ្លួន បញ្ជូនទៅក្រសួងមហាផ្ទៃ ឬ រដ្ឋបាលរាជធានី ខេត្តនោះ អំពីការបើកសាខាបន្ថែមនៅក្នុងរាជធានី ឬបណ្តាខេត្តនានា មុនអនុវត្តសកម្មភាពរបស់ខ្លួន។
លិខិតដដែលបញ្ជាក់ថា បើអង្គការ សមាគម មិនធ្វើតាមការណែនំានេះទេ ហើយអង្គការ សមាគមនោះ ចុះធ្វើសកម្មភាពប្រមូលផ្តុំប្រជាពលរដ្ឋធ្វើបាតុកម្មនានា ឬធ្វើឲ្យប៉ះពាល់ដល់សណ្តាប់ធ្នាប់ សាធារណៈ និងសន្តិសុខជាតិ គឺរដ្ឋបាលរាជធានី ខេត្ត និងអាជ្ញាធរពាក់ព័ន្ធ មានសិទ្ធិ បញ្ឈប់ ឬផ្អាកសកម្មភាព ឬលុបឈ្មោះ អង្គការ សមាគមនោះ ចេញពីបញ្ជីនៅក្រសួងមហាផ្ទៃ។
មន្ត្រីស៊ើបអង្កេតជាន់ខ្ពស់នៅសមាគមអាដហុកលោក សឹង សែនករុណា មានប្រសាសន៍ថា អង្គការ សមាគម ត្រូវតែជូនដំណឹងជាលាយលក្ខណ៍អក្សរ ទៅក្រសួងមហាផ្ទៃ ឬស្ថាប័នរដ្ឋបាលរាជធានី ខេត្តនានា ពាក់ព័ន្ធការធ្វើលិខិតជាលក្ខណ៍អក្សរជូនដំណឹងទៅក្រសួងពីការបើកសាខា មុនអនុវត្តសកម្មភាពរបស់ខ្លួន ដោយថាកុំឲ្យស្ថាប័នរដ្ឋយល់ថា អង្គការ សមាគម ប្រឆំាងរដ្ឋាភិបាល ដូចកាលពីកន្លងទៅ។
លោកនិយាយថា «យើងដឹងហើយថា សកម្មភាពរបស់ពួកយើង[សង្គមស៊ីវិល] មិនមែនសកម្មភាពអ្វីមួយដែលធ្វើការដើម្បីប្រឆំាងទៅរដ្ឋាភិបាលទេ ផ្ទុយទៅវិញជាអង្គការដែលជាដៃគូរបស់រដ្ឋាភិបាល ដើម្បីធ្វើការចូលរួម ក្នុងការស្តា ឬក៏ជួយសហការណ៍ជាមួយរដ្ឋាភិបាលវិញទេ ដើម្បីការពារទៅលើសិទ្ធិរបស់ប្រជាពលរដ្ឋ និងលទ្ធិប្រជាធិបតេយ្យ ដោយស្របទៅលើច្បាប់អន្តរជាតិ ហើយនិងច្បាប់ជាតិ ជាពិសេសច្បាប់កំពូលរបស់ប្រទេសយើង គឺរដ្ឋធម្មនុញ្ញរបស់កម្ពុជាតែម្តង»។
របាយការណ៍ស្តីពីលទ្ធផលការងារឆ្នាំ២០១៥ និងលើកទិសដៅការងារឆ្នាំ២០១៦ របស់ក្រសួងមហាផ្ទៃ បានបង្ហាញឲ្យដឹងថា សមាគម អង្គការមិនមែនរដ្ឋាភិបាល ដែលបានចុះបញ្ជីនៅក្រសួងមហាផ្ទៃ មានចំនួនសរុប ៤៧១៥ ក្នុងនោះសមាគម មានចំនួន១៨៣២ អង្គការមិនមែនរដ្ឋាភិបាល មានចំនួន២៨៨៣៕
