សហភាពអឺរ៉ុបកំពុងពិចារណាសើរើទំនាក់ទំនងជាមួយកម្ពុជា និង ការពិនិត្យលើការកាត់ជំនួយដែលគាំទ្រលើដំណើរការរៀបចំការបោះឆ្នោតនៅកម្ពុជានាពេលខាងមុខ។
លោកឯកអគ្គរដ្ឋទូតសហភាពអឺរ៉ុបប្រចាំកម្ពុជាលោក George Edgar បានថ្លែងនៅក្នុងសន្និសីទសារព័ត៌មានខ្លីមួយកាលពីថ្ងៃសុក្រថា បានៅរយៈពេលប៉ុន្មានថ្ងៃខាងមុខ សហភាពអឺរុបនឹងបង្ហាញលទ្ធផលមួយអំពីការសើរើទំនាក់ទំនងជាមួយកម្ពុជា ជាពិសេសគឺជុំវិញដំណើរការរៀបចំការបោះឆ្នោតជាតិ នាឆ្នាំ២០១៨។
លោក George Edgar បានបន្ថែមថាគណៈកម្មការអឺរ៉ុបកំពុងធ្វើការសម្រេចចិត្តថាតើ នឹងបន្តផ្តល់ជំនួយដល់ គ.ជ.ប ទៀតឬយ៉ាងណា បន្ទាប់ពីសមាជិក គ.ជ.ប ៣រូប មកពីអតីតបក្សសង្គ្រោះជាតិលាលែង ពីតំណែងក្រោយ បក្សប្រឆាំងធំនេះត្រូវបានរំលាយ ហើយអ្នកថ្មី ៣រូបត្រូវបានតែងតាំងជំនួស។
លោក George Edgar បានថ្លែងថាលទ្ធផលដែលនឹងចេញនោះ បានមកពីកិច្ចពិភាក្សា ក្នុងស្នាក់ការធំ ទីក្រុងព្រុយសែល ពាក់ព័ន្ធនឹងដំណើរការអនុវត្តរបស់រដ្ឋាភិបាលកម្ពុជាដែលឃ្លាតពីគន្លងលទ្ធិប្រជាធិបតេយ្យ ដូចបានចែងនៅក្នុងរដ្ឋធម្មនុញ្ញកម្ពុជា ហើយត្រូវបានគាំទ្រដោយដៃគូអន្តរជាតិរួមទាំងសហភាពអឺរ៉ុបផងដែរ។
ការលើកឡើងពីការសើរើពីទំនាក់ទំនងនេះធ្វើឡើងក្រោយពីសហរដ្ឋអាមេរិកប្រកាសដាក់ទណ្ឌកម្មទិដ្ឋាការលើមន្រ្តីជាន់ខ្ពស់រដ្ឋាភិបាល និងក្រុមគ្រួសារ។
ទោះបីជាយ៉ាងណាមន្រ្តីរដ្ឋាភិបាលបានហៅការដាក់ទណ្ឌកម្មនេះថាជាការលូកដៃចូលក្នុងអធិបតេយ្យភាព និងការចូលរួមសម្លាប់លទ្ធិប្រជាធិបតេយ្យនៅកម្ពុជា ហើយពួកគេអះអាងថាការអនុវត្តទៅលើបក្សប្រឆាំងគឺជាការសម្រេច របស់តុលាការ មិនមានជាប់ពាក់ព័ន្ធនិងរឿងនយោបាយនោះទេ៕