ប្រទេសជប៉ុនកំពុងតែប្រមូល និងវិភាគព័ត៌មានស្ដីពីស្ថានភាពគ្រាប់មីស៊ីលនុយក្លេអ៊ែររបស់កូរ៉េខាងជើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សម្ដីអ្នកនាំពាក្យរដ្ឋាភិបាលជប៉ុន នៅថ្ងៃនេះ។
ប្រធានខុទ្ទកាល័យគណៈរដ្ឋមន្ត្រី លោក Yoshihide Suga បានថ្លែងក្នុងសន្និសីតសារព័ត៌មានថា រដ្ឋាភិបាលនឹងចាត់វិធានការចាំបាច់ទាំងអស់ដើម្បីព្រមាន និងតាមដានកូរ៉េខាងជើង។
កូរ៉េខាងជើង បានប្រកាសកាលពីថ្ងៃអាទិត្យកន្លងមកថា ខ្លួនអាចនឹងចាប់ផ្ដើមបាញ់សាកល្បងគ្រាប់មីស៊ីលឆ្លងទ្វីបនៅពេលណាមួយ ដោយមេដឹកនាំក្រុងព្យុងយ៉ាងនិយាយថា គោលនយោបាយបង្កជម្លោះរបស់អាមេរិក គឺជាមូលហេតុសម្រាប់ការអភិវឌ្ឍសព្វាវុធរបស់ខ្លួន៕
