អនាគតប្រធានាធិបតីអាមេរិក លោក ដូណាល់ ត្រាំ និងមហាសេដ្ឋីចិន លោក Jack Ma ស្ថាបនិកក្រុមហ៊ុន Alibaba បានជួបពិភាក្សាគ្នានៅទីក្រុងញូវយ៉ក នៅថ្ងៃនេះ ដោយផ្ដោតទៅលើការបង្កើតការងារ និងការធ្វើពាណិជ្ជកម្មនៅអាស៊ី។ នេះដោយយោងតាមការផ្សាយរបស់ទីភ្នាក់ងារ AFP។
លោក ត្រាំ ដែលនឹងស្បថចូលកាន់តំណែងជាអគ្គមេបញ្ជាការកងទ័ពនៅសប្ដាហ៍ក្រោយនេះ បានយករឿងបង្កើតការងារធ្វើជាការសន្យាសម្រាប់រដ្ឋបាលរបស់លោក បើទោះបីជាលោកមិនធ្លាប់កាន់តំណែងក្នុងរដ្ឋការក៏ដោយ។
ក្រុមការងាររបស់លោក ត្រាំ បាននិយាយថា ជំនួបរវាងមហាសេដ្ឋីអចលនទ្រព្យរូបនេះ និងមហាសេដ្ឋីចិន ផ្ដោតទៅលើវិធីដែលក្រុមហ៊ុន Alibaba អាចបង្កើតការងារចំនួន ១លានកន្លែងនៅអាមេរិក តាមរយៈការបង្កើតអាជីវកម្មតូចៗចំនួន ១លាន នៅអាមេរិក ដើម្បីលក់ទំនិញទៅចិន និងតំបន់អាស៊ី។
បន្ទាប់ពីអមដំណើរលោក Jack Ma ចុះទៅជាន់ផ្ទាល់ដីនៃទីស្នាក់ារកណ្ដាលក្រុមហ៊ុនលោកនោះ លោក ត្រាំ បានប្រាប់អ្នកយកព័ត៌មានថា៖ “យើងមានជំនួបដ៏អស្ចារ្យ”។ លោក ត្រាំ បានកោតសរសើរមហាសេដ្ឋីចិនរូបនេះថា ជាសហគ្រិនដ៏អស្ចារ្យមួយនៅលើពិភពលោក៕