ក្រុមមេធាវីការពារក្តីឲ្យអតីតប្រធានគណបក្សសង្គ្រោះជាតិ កំពុងតែរៀបចំពាក្យស្នើសុំ ហើយថា នឹងដាក់ទៅចៅក្រមសាលាដំបូងរាជធានីភ្នំពេញក្នុងសប្តាហ៍នេះ ដើម្បីស្នើឲ្យកូនក្តីបាននៅក្រៅឃុំបណ្តោះអាសន្ន។
លោក កឹម សុខា ត្រូវបានសមត្ថកិច្ចចាប់ខ្លួនកាលពីថ្ងៃទី០៣ខែកញ្ញា និងបញ្ជូនទៅឃុំខ្លួននៅពន្ធនាគារត្រពាំងផ្លុង ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ជុំវិញវីដេអូឃ្លីប នៃការថ្លែងរបស់លោកនៅក្នុងប្រទេសអូស្ត្រាលី កាលពីឆ្នាំ២០១៣ ដែលត្រូវបានរដ្ឋាភិបាលចោទថា «បានឃុបឃិតជាមួយបរទេស មានបំណងផ្ដួលរំលំរដ្ឋាភិបាលស្របច្បាប់» រហូតមកដល់ពេលនេះលោកត្រូវបានជាប់ឃុំជាង៤ខែហើយ។
មេធាវីការពារក្តីឲ្យលោកកឹម សុខាលោក សំ សុគង់ បានប្រាប់វីអូឌីថាក្រុមលោកបានព្រាងពាក្យសុំត្រៀមដាក់ទៅសាលាដំបូងរួចរាល់ហើយ ដែលអាចនឹងយកទៅដាក់នៅសប្តាហ៍នេះ។ ខណៈពាក្យសុំជាច្រើនរបស់ក្រុមមេធាវីត្រូវបានតុលាការច្រានចោលនោះ លោកថាក្រុមមេធាវីការពារក្តីមានសង្ឃឹមតិចតួចណាស់។
លោកថា៖ « ប៉ុន្តែអ្វីដែលមេធាវីព្យាយាមក្នុងការធ្វើនោះគឺក្រុមមេធាវីត្រូវធ្វើទៅតាមនីតិវិធីផ្លូវច្បាប់ដែលបានកំណត់តាមច្បាប់ជាតិឬអន្តរជាតិនោះចំពោះសិទ្ធិរបស់ជនត្រូវចោទដែលអាចស្នើសុំឲ្យតុលាការហ្នឹងសម្រេចឲ្យខ្លួនមានសេរីភាពឬក្រៅឃុំជាបណ្តោះអាសន្ននៅក្នុងអំឡុងពេលនៃការឃាត់ខ្លួនឬឃុំខ្លួនហ្នឹង។ អញ្ចឹងយើងត្រូវអនុវត្តន៍ច្បាប់ទោះបីយើងថា មិនសូវសង្ឃឹម តែទិដ្ឋភាពច្បាប់យើងនៅតែមានសិទ្ធិ» ។
កាលពីឆ្នាំ២០១៧កន្លងទៅតុលាការបានបដិសេធការស្នើសុំរបស់មេធាវីដែលបានសុំឲ្យផ្លាស់ប្តូរកន្លែងឃុំខ្លួនលោក កឹម សុខា ពីពន្ធនាគារត្រពាំងផ្លុងខេត្តត្បូងឃ្នុំ មកពន្ធនាគារព្រៃសដោយលើកឡើងថាការផ្លាស់ប្តូរកន្លែងឃុំខ្លួនមិនមែនជាសមត្ថិកិច្ចរបស់តុលាការនោះទេ។
គួរបញ្ជាក់ផងដែរថា ក្រោយមានការចាប់ខ្លួនមេដឹកនាំបក្សប្រឆាំង និងការរំលាយអតីតគណបក្សសង្រ្គោះជាតិ សហគមន៍អន្តរជាតិ និងអង្គការអន្តរជាតិ បានថ្កោលទោសរដ្ឋាភិបាលកម្ពុជាជាបន្តបន្ទាប់។ នៅពេលថ្មីៗនេះ សហរដ្ឋអាមេរិកផ្អាកផ្ដល់ជំនួយដល់គណៈកម្មាធិការជាតិរៀបចំការបោះឆ្នោត និងបានរឹតបន្តឹងផ្នែកទិដ្ឋាការលើមន្ត្រីជាន់ខ្ពស់កម្ពុជា និងសមាជិកក្រុមគ្រួសាររបស់ពួកគេ ។
ចំណែកសហភាពអឺរ៉ុប ក៏បានសម្រេចផ្អាកផ្ដល់ជំនួយដល់ គ.ជ.ប ក្រៅពីនេះ សហភាពអឺរ៉ុបក៏បានប្រាប់ទៅគណៈកម្មការអឺរ៉ុប ឲ្យសើរើការផ្ដល់ភាពអនុគ្រោះផ្នែកពន្ធគយសម្រាប់ប្រទេសកម្ពុជា និងរៀបចំបញ្ជីឈ្មោះក្រុមមន្ត្រីជាន់កម្ពុជា សម្រាប់រឹតបន្តឹងផ្នែកទិដ្ឋាការ និងបង្កកទ្រព្យសម្បត្តិរបស់ពួកគេ ដែលជាការឆ្លើយតបទៅនឹងការរំលាយគណបក្សប្រឆាំងដ៏ធំនៅក្នុងប្រទេសផងដែរ៕