អតីតនាយករដ្ឋមន្ដ្រីថៃទទូចឱ្យអ្នកគាំទ្រគណបក្សភឿថៃធ្វើចិត្តឱ្យស្ងប់រង់ចាំថៃ្ងផ្លាស់ប្ដូរតាមរយៈការបោះឆ្នោត​

អតីតនាយករដ្ឋមន្ដ្រីថៃដែលនិរទេសខ្លួនបានទទួចឲ្យអ្នកនយោបាយគណបក្សភឿថៃត្រូវត្រៀមខ្លួនដើម្បីចូលរួមការបោះឆ្នោតដែលលោករំពឹងថាការបោះឆ្នោតពេលនោះនឹងនាំឲ្យមានការផ្លាស់ប្ដូរហើយលោកនឹងបានចូលប្រទេសវិញ។

សារព័ត៌មាន Thai The Nation បានឲ្យដឹងថាលោក ថាក់ ស៊ីន បានថ្លែងដូចនេះតាមរយៈវីឌីអូ Conference ដែលលោកចូលរួមជាមួយប្រជាជនថៃសែស្រឡាយចិនក្នុងឱកាសបុណ្យចូលឆ្នាំចិនកាលពីថ្ងៃអាទិត្យ។

អតីតនាយករដ្ឋមន្ដ្រីថៃរូបនេះបានបន្ដថាសមាជិកគណបក្សភឿថៃទាំងអស់ត្រូវរួមកំលាំងគ្នាដើម្បីធ្វើដំណើរឆ្ពោះទៅរកការបោះឆ្នោតដែលលោកថាជាឱកាសមួយអាចនាំឲ្យមានការផ្សះផ្សារជាតិ។

ជាមួយគ្នានេះលោកក៏បានរិះគន់សេចក្ដីព្រាងរដ្ឋធម្មនុញ្ញដែលរៀបរៀងបច្ចុប្បន្នដោយពួកយោធាថាជាច្បាប់មួយមានលក្ខណៈរឹតបន្ដឹងសិទ្ធសេរីភាពរបស់ប្រជាជនហើយយកគំរូតាមរដ្ឋធម្មនុញ្ញរបស់ពួកយោធាភូមានិងកូរ៉េខាងជើង។

អតីតនាយករដ្ឋមន្ដ្រីថៃ ថាក់ស៊ីន ស៊ីណាវ៉ាតត្រា បានរស់នៅនិរទេសខ្លួនជាច្រើនឆ្នាំមកនេះដោយសារលោកប្រឈមមុខនិងការកាត់ទោសករណីពុករលួយនិងបំពានអំណាចរដ្ឋ។

លោក ថាក់ ស៊ីន ត្រូវបានផ្ដួលរំលំដោយរដ្ឋាភិបាលយោធានៅឆ្នាំ២០០៤។ បច្ចុប្បន្នប្អូនស្រីរបស់លោកគឺអតីតនាយករដ្ឋមន្ដ្រី យីងឡាក់ ក៏ប្រឈមមុខនិងផ្លូវច្បាប់ផងដែរករណីពុករលួយ៕

ប្រភព: The Nation