ប្រធានាធិបតីអាមេរិក លោក ដូណល ត្រាំ ថ្លែងប្រាប់ប្រធានាធិបតីចិន លោក ស៊ី ជិនពីង ថារដ្ឋការរបស់លោក គោរពគោលនយោបាយចិនតែមួយ គឺថ្លែងពេលមេដឹកនាំទាំងពីរជជែកគ្នាតាមទូរសព្ទក្នុងនាមតំណាងឲ្យប្រជាជាតិនៃប្រទេសទាំងពីរ។
នេះបើតាមការចុះផ្សាយរបស់ Financial Times នៅថ្ងៃសុក្រនេះ។ លោក ដូណល ត្រាំ ចាប់ផ្តើមចូលកាន់តំណែងជាប្រធានាធិបតីអាមេរិកកាលពីខែមុន។ លោកធ្លាប់ថ្លែងកាលពីខែធ្នូថា សហរដ្ឋអាមេរិកមិនយល់ថា មានសារសំខាន់ក្នុងការគោរពគោលនយោបាយចិនតែមួយនោះទេ។
ពេលនោះលោក ត្រាំ បានហៅទូរសព្ទទាក់ទងមេដឹកនាំតៃវ៉ាន់ លោកស្រី សៃ អ៊ឹងវេន ហាក់ដូចជា ទំនាក់ទំនងរវាងរដ្ឋនិងរដ្ឋ នាំឲ្យរដ្ឋអំណាចនៃទីក្រុងប៉េកាំងខឹងយ៉ាងខ្លាំង។ ពេលនោះចិនហៅ លោក ត្រាំ និងមន្ត្រីរបស់លោកមិនមានចំណេះដឹងពីកិច្ចការការទូត៕