ហែលឆ្លងអតីតកាលពីពលករទៅបម្រើការនៅក្នុងប្រទេសកូរ៉េកាលពីអំឡុងឆ្នាំ២០០៨សោះ លោក ឡេង ណាវ៉ាត់ត្រា ដែលគេស្គាល់ថាជាម្ចាស់ផលិតកម្ម Galaxy បានក្លាយជាអ្នកជំនួញដីធ្លីយ៉ាងជោគជ័យមិនគួរអោយជឿ។ មានការបង្ហើបថាជំនួញដីធ្លីដែលលោកប្រថុយប្រថាននោះ ពេលនេះកើនដើមទុនដល់១លានដុល្លារហើយ ក្រោយមានការរីកចំរើន។
គ្មានអ្នកណាមិនដឹងនោះទេថា ម្ចាស់ផលិតកម្ម Galaxy ដែលបានផលិតរឿង «កំពូលល្ងង់នៅអាស៊ី» គឺជាអតីតពលករនៅក្នុងប្រទេសកូរ៉េ ដោយមុនពេលចាកចេញទៅធ្វើការនៅទីនោះ លោកគ្រាន់តែជាសមាជិកម្នាក់ក្នុងគ្រួសារយ៉ាងកម្សត់ ព្រោះតែភាពក្រីក្រប៉ុណ្ណោះ។
លោកថាជិវិតជាពលករបានជួយកែខៃអោយលោកមានដង្ហើមថ្មី ហើយអ្វីដែលធ្វើអោយលោកប្រែប្រួលខ្លាំងឡើងនោះ គឺភាពប្រថុយប្រថាននិងការតស៊ូក្នុងការបណ្ដាក់ទុន។ លោកថាក្នុងពេលបម្រើការនៅក្នុងប្រទេសកូរ៉េ ថ្វីដ្បិតតែលោកត្រូវយកចំណូលមួយភាគផ្គត់ផ្គង់គ្រួសារ ប៉ុន្តែលោកក៏បានប្រឹងប្រែងធ្វើការថែមម៉ោងសន្សំលុយទិញដីទុកជារបស់ផ្ទាល់ខ្លួនបានតិចតួចដែរ។
បានដើមពីការលក់ដីនោះហើយដែលលោកបូកបញ្ចូលជាមួយប្រាក់កាសសន្សំផ្សេងទៀត ហើយប្រថុយរកស៊ីដីធ្លីរហូតទទួលបានជោគជ័យមកទល់សព្វថ្ងៃ។ លោកប្រថុយទិញដីស្រែចាក់ដី ហើយពុះឡូតិ៍លក់តាំងពីដើមទុនតិច រហូតពង្រីកមុខជំនួញបានធំមកទល់សព្វថ្ងៃ។
លោកសារភាពថាខ្លួនមានដើមប្រមាណ១លានដុល្លារ ហើយក្រោយការទិញលក់ៗដីស្រែធំៗហើយចាក់បំពេញធ្វើដីឡូតិ៍លក់ ដោយលទ្ធភាពនោះមិនមែនកើតឡើងដោយសារឱកាសនោះទេ ប៉ុន្តែកើតឡើងដោយសារតស៊ូស៊ីអត់ស៊ីឃ្លាន ហើយសន្សំប្រាក់ និងហ៊ានប្រថុយធ្វើជំនួញ ដោយមិនខ្លាចខាតបង់។
លោកថាក្នុងពេលសម្រេចចិត្តធ្វើជំនួញដំបូងៗមានមនុស្សតិចណាស់បានគាំទ្រលោក ជាពិសេសនៅពេលដែលលុយកាក់លោកក៏មានតិចផង។ យ៉ាងណាមិញ លោកបានកែប្រែទស្សនៈរបស់មនុស្សដែលធ្លាប់មាក់ងាយចំពោះលោកទាំងនោះអោយមើលឃើញថាការតស៊ូនិងការរៀបចំគម្រោងដោយមានភាពច្បាស់លាស់ គឺនឹងជោគជ័យ បើទោះជាមុខរបរដែលខ្លួនចេញរកមានដើមមិនច្រើន។
មកទល់ពេលនេះ លោកមិនត្រឹមតែចំណេញដីធ្លីបានលុយបើកផលិតកម្ម Galaxy ដើម្បីបានក្លាយជាអ្នកចម្រៀងតាមក្ដីស្រម៉ៃរបស់ខ្លួនប៉ុណ្ណោះទេ ក៏បានពង្រីកមុខជំនួញតាំងពីមានដើមទុនមិនស្មើនឹងអ្នកមានដើរលេងក្រៅស្រុកម្ដង ទៅជាអ្នកជំនួញដែលមានដីធ្លី និងដើមទុនសរុបជាប្រាក់មិនក្រោម១លានដុល្លារនោះផងដែរ។
លោកអះអាងថាពលករដែលបានទៅបម្រើនៅក្នុងប្រទេសកូរ៉េ ភាគច្រើនបានកែប្រែស្ថានការណ៍ជីវិតរបស់ខ្លួនអោយបានល្អប្រសើរក្រោយពេលត្រលប់មកវិញ ប៉ុន្តែបើខ្វះការតស៊ូ និងរៀបចំផែនការក៏មិនមានប្រាក់កាស តាមក្ដីប្រាថ្នារបស់ខ្លួននោះដែរ។
អ៊ីចឹងហើយទើបលោកក៏ទទូចអោយពលករ ឬអ្នកដែលមានឱកាសមានដើមតិចតួចដែលអាចប្រកបមុខជំនួញបានហ៊ានដាក់គម្រោងផែនការហើយកែប្រែជីវិតរបស់ខ្លួនតាមការប្រថុយធ្វើជំនួញ។ លោកថាការបណ្ដាក់ទុនទោះតិចឬច្រើន ត្រូវប្រឈមផ្លូវ២គឺខាតអស់ដើម ឬបានចំណេញកប់ក្ដោង។
យ៉ាងណាមិញ ប្រសិនបើមានគម្រោងច្បាស់លាស់ នោះភាពជោគជ័យក៏មានក្នុងដៃផងដែរ។ លោកទទូចអោយក្រុមពលករដែលមានសំណាងបានចេញទៅធ្វើការនៅក្នុងប្រទេសកូរ៉េឬនៅប្រទេសផ្សេង កុំសប្បាយភ្លើតភ្លើននឹងការចាយវាយ ដោយបង្វែរជាការសន្សំលុយកាក់ទុកសម្រាប់ត្រលប់មកវិញអោយច្រើន។
លោកថាក្នុងពេលមិនទាន់ក្លាយជាអ្នកជំនួញដីធ្លី លោកមិនមែនជាបុគ្គលសម្ភារៈនិយមនោះទេ ដោយសារតែគ្រួសាររបស់លោកគ្រាន់តែជាគ្រួសារក្រីក្រមួយ ដែលមានត្រឹមឱកាសអោយលោកបានសិក្សា ហើយប្រលងជាប់ទៅធ្វើការនៅកូរ៉េ។
លោកថាកាលពីអតីតកាលគ្រួសារបស់លោករស់នៅតែផ្ទះខ្ទមលិចទឹកពេលភ្លៀងប៉ុណ្ណោះ ដោយសូម្បីតែអ្នកក្នុងភូមិ និងក្រុមគ្រួសារក៏មាក់ងាយដែរ ដោយសារតែឪពុកមានមុខរបររែកដី ហើយរកបាយសម្រាប់៣ពេលក្នុងគ្រួសារមិនបាន។
លោក ឡេង ណាវ៉ាត់ត្រា បន្តថា បើសម្អាងលើឱកាសទៅធ្វើការនៅកូរ៉េ ហើយត្រលប់មកវិញដើម្បីស្វែងរកការងារក្នុងស្រុកធ្វើបន្ត លោកប្រហែលមិនមានឱកាសមានលុយមានជីវិតដល់កម្រិតហ្នឹងទេ ប៉ុន្តែមកពីលោកតស៊ូសន្សំលុយ ហើយចុងក្រោយបានរៀបគម្រោងទិញដីពុះឡូតិ៍លក់ទើបធ្វើអោយលោកបានស្គាល់ប្រាក់ម៉ឺនដុល្លារ។
លោកនិយាយថា «រាល់ថ្ងៃមានមនុស្សតិចណាស់ ជឿថាខ្ញុំមកដល់ចំណុចនេះ តែខ្ញុំចង់ប្រាប់ថាជោគជ័យមិនសុទ្ធតែកើតចំពោះអ្នកមានទេ សំខាន់អោយតែយើងចេះតស៊ូ ចេះរៀបគម្រោង ហើយហ៊ានប្រថុយប្រថានរឿងមុខជំនួញដើម្បីអោយក្ដីស្រម៉ៃរបស់ខ្លួនជោគជ័យ!»។
លោកថារាល់ថ្ងៃលោកមានក្រុមហ៊ុនធំ២ក្នុងដៃ គឺក្រុមហ៊ុនអចលនទ្រព្យនិងជាចាងហ្វាងផលិតកម្ម Galaxy ដែលក្នុងផលិតកម្មនោះ លោកក៏ជាអ្នកចម្រៀង Original Song ម្នាក់ដែរ។ លោកអះអាងថាខ្លួនមានទ្រព្យសម្បត្តិគួរសមបន្ថែមពីលើដីធ្លីដែលត្រូវទិញលក់។
ក្នុងនោះក្រៅពីមានផ្ទះរស់នៅស្កឹមស្កៃ លោកក៏ទើបតែត្រូវគេឃើញដូររថយន្ត Tundra ស៊េរីទំនើបតម្លៃជិត១០ម៉ឺនដុល្លារ ដោយមិនរាប់បញ្ចូលរថយន្តរាយរងមួយចំនួនទៀត៕
