នៅក្នុងរបបប្រជាធិបតេយ្យ ការប្រកួតប្រជែងខាងសារនយោបាយ គឺជាយុទ្ធសាស្ត្រមួយដែលអាចទាក់ទាញការគាំទ្រពីម្ចាស់ឆ្នោត។ ប៉ុន្តែសារនយោបាយឬពាក្យស្លោកនោះ ត្រូវតែមានមានន័យគ្រប់គ្រាន់ ហើយងាយយល់ ងាយចងចាំនិងអាចអនុវត្តបាននៅពេលបក្សនោះជាប់ឆ្នោត។
គណបក្សសង្រ្គោះជាតិបានបង្កើតសារនយោបាយមួយដែលធ្វើឲ្យម្ចាស់ឆ្នោតមានការចងចាំនិងនាំគ្នាទន្ទិញរត់មាត់កាលពីពេលឆ្នោតឆ្នាំ២០១៣នោះគឺ «ដូរឬមិនដូរ»។ ប៉ុន្តែក្រោយមកនៅពេលដែលគណបក្សប្រឆាំងប្រើពាក្យនេះបន្តទៀត បានធ្វើឲ្យមានប្រតិកម្មជាបន្តបន្ទាប់ពីលោកនាយករដ្ឋមន្រ្តី ហ៊ុន សែន រួមទាំងរដ្ឋមន្រ្តីក្រសួងការពារជាតិផង ដោយចោទថាការប្រើពាកក្យនេះនាំឲ្យ «អសន្តិសុខដល់សង្គម»។
ចំណែករឿងដែលកំពុងត្រូវបានសាធារណៈជនចាប់អារម្មណ៍នៅសប្តាហ៍ចុងក្រោយនេះគឺការព្រមានប្តឹងដោយគណបក្សកាន់អំណាចទៅលើបក្សប្រឆាំងដែលទើបបង្កើតសារនយោបាយថ្មីមួយទៀតដែលថា «ដូរមេឃុំបម្រើបក្ស ដាក់មេឃុំបម្រើរាស្ត្រ» សម្រាប់យុទ្ធនាការបោះឆ្នោតឃុំ-សង្កាត់ថ្ងៃ៤ខែមិថុនាខាងមុខ។
ជាការកត់សំគាល់សារនយោបាយទាំងពីរនេះរបស់បក្សប្រឆាំងបានធ្វើឲ្យមានការទាក់ទាញច្រើនពីមហាជន ហើយពាក្យនេះត្រូវបានពលរដ្ឋមួយចំនួន និយាយតៗគ្នាពីមាត់មួយទៅមាត់មួយទៀតផង។
ដោយទំនងជាវាយបកទៅលើគួរប្រកួតវិញ អ្នកគាំទ្រគណបក្សកាន់អំណាចបានបោះពុម្ពអាវយឺតដោយសរសេរថា «មិនដូរលុះក្ស័យ» និងបង្កើតពាក្យថ្មីឆ្លើយបតទៅនឹងគណបក្សប្រឆាំងវិញថា «កុំដាក់មេឃុំប្រូ ដូរមេឃុំពិត»។
លើសពីនេះទៀតមនុស្សរបស់គណបក្សប្រជាជនដែលអះអាងថាជាពួកគេជាមេឃុំឬចៅសង្កាត់រាប់រយនាក់បាននាំគ្នាចេញសេចក្តីថ្លែងការណ៍ថ្កោលទោសសារនយោបាយរបស់គណបក្សប្រឆាំង។ក្នុងសេចក្តីថ្លែងការណ៏ ពួកគេអះអាងថា ខ្លួនបានបម្រើរាស្ត្រច្រើនជាងបម្រើបក្ស។
ក្រុមអ្នកវិភាគ យល់ថា ការប្រើប្រាស់នយោបាយគឺជាយុទ្ធសាស្ត្ររៀងៗខ្លួនរបស់គណបក្សនីមួយៗដើម្បីទាក់ទាញអ្នកគាំទ្រ ប៉ុន្តែកុំឲ្យតែសារនយោបាយនោះ ប៉ះពាល់ដល់អង្គព្រះមហាក្សត្រឬត្រូវបានច្បាប់បោះឆ្នោតហាមឃាត់។
ចំពោះសារនយោបាយ «ដូរមេឃុំបម្រើបក្ស ដាក់មេឃុំបម្រើរាស្ត្រ» អ្នកវិភាគមួយចំនួន បង្ហាញទស្សនៈប្រហាក់ប្រហែលគ្នាថាជាការជំរុញឲ្យមានអភិបាលកិច្ច នៅថ្នាក់មូលដ្ឋាន តាមរយៈការជាប់ជាមេឃុំ ឬចៅសង្កាត់ ដែលបម្រើរាស្ត្រពិតប្រាកដ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា លើកឡើងថា សារនយោបាយដែលសរសេរថា ដូរមេឃុំបម្រើបក្ស ដាក់មេឃុំបម្រើរាស្ត្រនោះ លោកថា ហាក់មិនបានសំដៅដល់មេឃុំគណបក្សណាមួយទេ ដោយសារបក្សប្រឆាំងក៏មានមេឃុំ និងចៅសង្កាត់ដែរ។លោកថា ផ្ទុយទៅវិញ សារនយោបាយនោះ បានជំរុញឲ្យមន្ត្រីថ្នាក់ក្រោមជាតិបង្កើនការយកចិត្តទុក្ខដាក់បម្រើពលរដ្ឋទៅវិញទេ ដើម្បីបានជាប់ជាមេឃុំ។
លោកថា៖ «ពាក្យស្លោកនឹងវាហាក់មិនចំត្រង់ចំនុចណាដែលថា វាញុះញង់វាអុចអាល ឬក៏វាទៅរំខានអ្នកនយោបាយមួយផ្សេងទៀតទេ។អានេះវាគ្រាន់តែជាការលើកទឹកចិត្ត សម្រាប់មេឃុំ ដែលជាប់ឆ្នោតហ្នឹងឲ្យគិតប្រយោជន៍ប្រជាពលរដ្ឋហ្នឹងជាធំ កុំគិតពីប្រយោជន៍បក្ខពួក»។
លោកបន្តថា «ដូច្នេះបើសិនជាមេឃុំណាមិនគិតបម្រើពលរដ្ឋជាធំទេ អាហ្នឹងពលរដ្ឋមិនបោះឆ្នោតឲ្យ។ នេះជាយន្តការមួយជួយដល់សេចក្តីត្រូវការ ឬជាបំណងរបស់ពលរដ្ឋ។អញ្ចឹងបើចង់ឲ្យដូរពាក្យហ្នឹងវាប៉ះពាល់ដល់សេចក្តីត្រូវការ របស់ប្រជាពលរដ្ឋទៅវិញទេ»។
លោក ឯម សុវណ្ណារ៉ា វិភាគថា បើបក្សកាន់អំណាចប្តឹងបក្សប្រឆាំងដោយសារតែប្រើសារនយោបាយបែបនេះ លោកថានឹងមិនទទួលបានការគាំទ្រពីម្ចាស់ឆ្នោតទេ។
លោកយល់ថា «ប្រសិនបើគណបក្សបក្សប្រជាជនរៀបចំយន្តការនេះប្តឹងផ្តល់ ជាមួយគណបក្សសង្គ្រោះជាតិមែន អាហ្នឹងយើងឃើញថា បញ្ហានេះជាការខាត់ របស់គណបក្សប្រជាជន ក្នុងការដណ្តើមប្រជាប្រិយភាព និងរងផលប៉ះពាល់កាន់តែធ្ងន់ទៅវិញទេ។ នេះបើតាមទស្សនៈដែលខ្ញុំគិត»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី កត់សំគាល់ថា ទាំងមេឃុំគណបក្សប្រឆាំង ទាំងមេឃុំបក្សកាន់អំណាច លោកថាពួកគេតែងធ្វើការបម្រើឲ្យបក្សជាធំដូចគ្នា។
ប៉ុន្តែលោកថា សារនយោបាយថា «ដូរមេឃុំបម្រើបក្ស ដាក់មេឃុំបម្រើរាស្ត្រ» លោកវិភាគថា ហាក់បានជំរុញឲ្យអ្នកនយោបាយ បន្តពង្រឹងប្រសិទ្ធភាពការងារ នៅថ្នាក់មូលដ្ឋាន ដើម្បីឆ្លើយតបទៅនឹងតម្រូវការរបស់ពលរដ្ឋកាន់តែច្រើន។ ប៉ុន្តែលោកវិភាគថា ជាការខាតទៅវិញទេ បើអ្នកនយោបាយណា មិនបានបំពេញតម្រូវការពលរដ្ឋ ហើយបែជាបង្កើតព្រឹត្តិការណ៏ដើម្បីប្រយោជន៍បក្សខ្លួនឯងនោះ។
លោកថា «នៅពេលដែលពលរដ្ឋចាប់ផ្តើមយល់ដឹងច្រើន ទទួលបានព័ត៌មានគ្រប់គ្រាន់ អ្នកនយោបាយត្រូវតែមានការប្រុយប្រយ័ត្នជាងមុន អាហ្នឹងបានអាចទាក់ទាញទឹកចិត្ត និងបេះដូងគាត់បាន ប៉ុន្តែបើគាត់នូវតែគិតថាពលរដ្ឋមិនដឹងអីទេ ការធ្វើឡើងបែបហ្នឹងដោយសារតែមានអ្នកញុះញង់អីអញ្ចឹងទៅ អាហ្នឹងខ្ញុំគិតថា អ្នកនយោបាយហ្នឹង បានដើរក្រោយពលរដ្ឋមួយជំហានធំហើយ»។
នាយកអង្គការឃ្លាំមើលការបោះឆ្នោតមួយហៅកាត់ថានិចហ្វិច លោក សម គន្ធាមី បញ្ជាក់ថា ក្នុងច្បាប់បោះឆ្នោតបានចែងទូលំទូលាយពេកដោយមិនកំណត់ជាក់លាក់ថា ហាមឃាត់មិនឲ្យប្រើសារនយោបាយបែបណា? ប៉ុន្តែលោកថាច្បាប់នេះបានហាមប្រើសារនយោបាយណាដែលថា «ញុះញង់ឲ្យមានអសន្តិសុខជាតិ»។ លោកថាត្រង់ចំណុចនេះហើយជាហេតុផលមួយដែលបក្សកាន់អំណាចយកលេសព្រមានប្តឹងបក្សប្រឆាំង។
បើតាមលោក សម គន្ធាមី យកល្អបក្សប្រឆាំងគួកែសម្រួលសារនយោបាយនោះឡើងវិញ ដើម្បីបញ្ជៀសកុំឲ្យមានពាក្យបណ្តឹងពីបក្សកាន់អំណាចទៅកាន់តុលាការ។
លោកមានប្រសាសន៍ថា «ជាយោបល់ខ្ញុំគួរតែដូរទៅ ហើយយើងរកសារផ្សេងទៅ កុំឲ្យមានវិវាទទៅតុលាការ។វាមានបរិយាកាសនយោបាយល្អក់កករ វាចេះតែមានរឿងជាមួយគ្នាក្តីក្តាំ»៕