ជនសង្ស័យពាក់ព័ន្ធនឹងបទល្មើសគ្រឿងញៀនដល់ទៅ ៣៥នាក់ ត្រូវបានសមត្ថកិច្ចចាប់ខ្លួន នៅក្នុងប្រតិបត្តិការបង្ក្រាបគ្រឿងញៀនត្រឹមតែមួយថ្ងៃម្សិលមិញ។ នេះដោយយោងតាមការផ្សាយរបស់វេបសាយនគរបាលជាតិ។
របាយការណ៍បង្ក្រាបគ្រឿងញៀនរបស់សមត្ថកិច្ច បានបង្ហាញថា បទល្មើសគ្រឿងញៀន ១៤ករណី ត្រូវបានសមត្ថកិច្ចបង្ក្រាបបាននៅទូទាំងប្រទេសកាលពីថ្ងៃម្សិលមិញនេះ ដោយឃាត់ខ្លួនជនសង្ស័យ ៣៥នាក់ ក្នុងមនុស្ស ២០នាក់ជាប់សង្ស័យជួញដូរគ្រឿងញៀន។
បទល្មើសគ្រឿងញៀន ត្រូវបានគេកត់សម្គាល់ឃើញថា កើតឡើងរៀងរាល់ថ្ងៃ ដោយសមត្ថកិច្ចចាប់ខ្លួនជនសង្ស័យដល់ទៅជាង ៧ពាន់នាក់រួចមកហើយ ចាប់តាំងពីដើមខែមករាក្នុងឆ្នាំនេះ៕
