អគ្គនាយកដ្ឋានពន្ធដារកម្ពុជា បានប្រកាសថា ខ្លួនប្រមូលថវិកាពន្ធអាករបានជាង ១០២០លានដុល្លារ នៅក្នុងរយៈពេល ៥ខែដើមឆ្នាំ២០១៧នេះ ដោយបានកើនឡើងជាង ៤៤ភាគរយ បើធៀបទៅនឹងចំណូលពន្ធដារយៈពេល ៥ខែឆ្នាំមុន។
ក្នុងសេចក្ដីប្រកាសព័ត៌មានកាលពីពេលថ្មីៗនេះ អគ្គនាកយកដ្ឋានពន្ធដារ បានឲ្យដឹងថា ថវិកាពន្ធអាករ ១០២០លាន ៥០ម៉ឺនដុល្លារ ត្រូវបានប្រមូលបាន នៅក្នុងរយៈពេល ០៥ខែ ឆ្នាំ២០១៧នេះ ដោយបានកើនឡើង ៤៤.០៩ភាគរយ បើធៀបទៅនឹងរយៈពេល ៥ខែឆ្នាំ២០១៦កន្លងមក។
អគ្គនាយកដ្ឋានពន្ធដារ បានអះអាងថា ប្រាក់ចំណូលពន្ធអាករកើនឡើងខ្ពស់បែបនេះ ដោយសារតែកំណើនពន្ធអាករស្ទើគ្រប់ប្រភេទ ដោយពន្ធលើប្រាក់ចំណូលកើនឡើង ៣៥.២ភាគរយ ពន្ធលើប្រាក់បៀវត្សរ៍កើនឡើង ៧.១ភាគរយ និងអាករលើតម្លៃបន្ថែមកើនឡើង ៥៩.២០ភាគរយ ខណៈដែលអាករពិសេសកើនឡើង ១១.៣ភាគរយ។
អគ្គនាយកដ្ឋានពន្ធដារ បានឲ្យដឹងបន្ថែមថា សម្រាប់ថវិកាពន្ធអាករនៅខែឧសភាកន្លងមក ស្ថាប័ននេះបញ្ជាក់ថា ប្រមូលបានជាង ១៣៨លានដុល្លារផងដែរ៕
