ប្រធានាធិបតីហ្វីលីពីនលោក Rodrigo Duterte បានបង្កជម្លោះកាទូតថ្មីមួយជាមួយភាសាវាយប្រហាររបស់លោក ដោយបានហៅអគ្គរដ្ឋទូតអាមេរិកថា «ខ្ទើយ» ដែលជំរុញឲ្យក្រុងវ៉ាស៊ីងតោន កោះហៅប្រេសិតហ្វីលីពីន ចូលទៅបកស្រាយនៅថ្ងៃពុធនេះ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
AFP បានរាយការណ៍បន្តថានៅក្នុងសម្ដីគ្មានសំចៃរបស់លោកជាបន្តបន្ទាប់ លោក Duterte បានថ្លែងជាភាសាតាហ្កូឡូកនៅតាមទូរទស្សន៍ ដោយប្រើប្រាស់សម្ដីរើសអើងភេទ ដើម្បីបង្ហាញភាពមិនសប្បាយចិត្តរបស់លោកចំពោះអគ្គរដ្ឋទូតអាមេរិក លោក Philip Goldberg កាលពីថ្ងៃសុក្រសប្ដាហ៍មុន។
លោក Duterte អាយុ៧១ឆ្នាំបានឡើងកាន់អំណាចក្រោយពីទទួលជ័យជម្នះយ៉ាងភ្លូកទឹកភ្លូកដីនៅក្នុងការបោះឆ្នោតកាលពីខែឧសភាកន្លងមក បន្ទាប់ពីលោកធ្វើយុទ្ធនាការ ដោយប្រើប្រាស់ភាសាមិនគោរពអ្នកដទៃ។
លោកបានឈានទៅមានវិវាទជាមួយប្រេសិតអាមេរិក លោក Goldberg បន្ទាប់ពីលោកនិយាយថា លោកចង់ចាប់រំលោភបេសកជនដ៏ស្រស់ស្អាតបស់អូស្ត្រាលី ដែលត្រូវបានគេរំលោភសម្លាប់នៅក្នុងកុបកម្មក្នុងពន្ធនាគារ នៅទីក្រុង Davao កាលពីឆ្នាំ១៩៨៩។ Davao គឺជាទីក្រុងដែលលោក Duterte បានគ្រប់គ្រងអស់រយៈពេល២ទសវត្សរ៍មកហើយ។
លោក Goldberg និងអគ្គរដ្ឋទូតអូស្ត្រាលីសុទ្ធតែបានរិះគន់ខ្លាំងៗចំពោះសម្ដីរបស់លោក Duterte៕
