តារាចម្រៀងប្រចាំផលិតកម្ម Pleng Record នាង សុខ ចិន្តា ហៅ វ៉ានីឡា គ្រាន់តែមកដល់ប្រទេសកម្ពុជាក្រោយបញ្ចប់ការសម្ដែងនៅក្នុងប្រទេសអូស្រ្តាលីភ្លាម ក៏សម្រេចចិត្តបង្ហាញខ្លួននៅសាលាដំបូងភ្លាមនៅព្រឹកថ្ងៃទី១០ សីហានេះ ដើម្បីបំភ្លឺលើពាក្យបណ្ដឹងរបស់នាង។ អ្វីដែលគេចាប់អារម្មណ៍គឺនាងនិងបងប្រុសបានបញ្ជាក់មុនចូលតុលាការថានឹងបន្តប្ដឹងឲ្យដល់ទីបំផុត ដោយមិនព្រមទទួលយកការសម្រុះសម្រួលនោះទេ បន្ទាប់ពីពាក្យបណ្ដឹងធ្លាក់ដល់ដៃតុលាការ។
មិនខុសពីការប្រកាសទុក តារាចម្រៀង វ៉ានីឡា និងក្រុមគ្រួសារនៅតែរក្សាជំហរប្ដេជ្ញាយ៉ាងមុតមាំថា នាងមិនព្រមសម្រុះសម្រួលនៅក្រៅប្រព័ន្ធតុលាការនោះទេ ក្នុងពេលដែលពាក្យបណ្ដឹងរបស់នាងត្រូវបានតុលាការសម្រេចចាត់ការនាព្រឹកថ្ងៃទី១០នេះ។
តាមការអះអាងរបស់នាងនិងបងប្រុសបានឲ្យដឹងថា ពាក្យបណ្ដឹងរបស់ខ្លួនត្រូវបានបញ្ជូនមកដល់សាលាដំបូងរាជធានីភ្នំពេញកាលពីដើមខែសីហា គឺចំពេលដែលនាងស្ថិតនៅប្រទេសអូស្រ្តាលីក្នុងគម្រោងចេញសម្ដែងនៅទីនោះ។
លោក សុខ ជំនោរ បានអះអាងថា តុលាកាបានសម្រេចកោះហៅឲ្យ វ៉ានីឡា ចូលបំភ្លឺតំាំងពីថ្ងៃទី៣សីហា ប៉ុន្តែដោយសារតែនាងទើបតែមកដល់ប្រទេសកម្ពុជាកាលពីថ្ងៃទី៨ខែសីហា ទើបសុំចូលបំភ្លឺនៅព្រឹកថ្ងៃទី១០សីហា នេះវិញ។
លោកថា វ៉ានីឡា និងមេធាវីចូលបំភ្លឺនៅសាលាដំបូងនៅវេលាម៉ោង៨និង៣០នាទី ដោយលោកបញ្ជាក់ថាគឺមិនមានអ្វីក្រៅពីខាងតុលាការឲ្យបំភ្លឺពាក់ព័ន្ធនឹងពាក្យបណ្ដឹងនោះឡើយ។
លោកថាតុលាការនៅមិនទាន់ប្រកាសពីវិធានការណាមួយនោះទេ គឺលើកលែងតែ វ៉ានីឡា បំភ្លឺរួចហើយ ហើយមានការកោះហៅដល់ភាគីខាងចុងចោទ។
លោក សុខ ជំនោរ បន្តថាវិធានការសម្រុះសម្រួលនឹងមិនមាននោះទេ បើទោះជាមានភាគីណាមួយឬក៏តុលាការនឹងប្រើនីតិវិធីសម្រុះសម្រួលដើម្បីបញ្ចប់រឿងណាមួយ។
លោកមានប្រសាសន៍ថា៖ “យើងអត់អាចទេ ការសម្របសម្រួល! ព្រោះបើតាមខ្ញុំយល់ គឺវាមិនអាចទេនៅក្នុងដំណាក់កាលនេះ ជាពិសេសបងប្អូនយើងជាសិល្បករ ជាមួយនឹងសមាគមដែលមេធាវីគាត់ធ្វើការហ្នឹង រហូតមកដល់ពេលនេះ គឺយើងមិនដែលបានគិតរឿងហ្នឹងទេ (សម្រុះសម្រួល) ! សំខាន់យើងមានការចូលរួមរបស់បងប្អូន ហើយភាគច្រើនគឺពួកគាត់ចង់ឲ្យច្បាប់ជាអ្នកកំណត់វិញ” ។
លោក សុខ ជំនោរ ឲ្យដឹងទៀតថា បើលោកនិងប្អូនស្រីទទួលយកការសម្រុះសម្រួលគឺមិនខុសពីធ្វើឲ្យបងប្អូនមហាជននិងតារាសិល្បៈដែលប្រឹងជ្រោមជ្រែងដល់នាងខកចិត្តនោះទេ ជាពិសេសចំពោះសកម្មភាពស្វះស្វែងរកមេដៃរហូតដល់ជាង៣០០មេដៃរបស់ស្ថាបនិក «គ្រួសារតារាកម្ពុជា» ដែលបានធ្វើញត្តិជួយដល់ វ៉ានីឡា ឲ្យមានចំណាត់ការអន្តរាគមន៍លើពាក្យបណ្ដឹងនោះ។
លោក សុខ ជំនោរ បន្តបង្ហាញជំហរថានឹងបន្តដាក់បណ្ដឹងរហូតដល់ទទួលបានយុត្តិធម៌ ដោយលោកយល់ថាយុត្តិធម៌ដែលលោកនិងប្អូនស្រីចង់បាន គឺទាល់តែជនល្មើសដែលបង្ហោះរូបនាងត្រូវបានកាត់ទោសដោយតុលាការ។
មុនពេលបង្ហាញខ្លួនក្នុងតុលាការ តារាចម្រៀងនាង វ៉ានីឡា បានឲ្យដឹងតាមរយៈប្រព័ន្ធទំនាក់ទំនងសង្គមថា សម្រាប់ការសម្រុះសម្រួល គឺមិនមានតម្លៃនោះទេ បើទោះជាចំណាត់ការរបស់តុលាការគឺមាននីតិវិធីសម្រុះសម្រួលមួយដំណាក់កាលសិនមុននឹងឈានដល់នីតិវិធីបន្ត។
នាង វ៉ានីឡា បានឲ្យដឹងទៀតថានាពេលកន្លងមកមិនអត់នោះទេ ចំពោះអ្នកចង់ចេញមុខសម្រុះសម្រួលដើម្បីបញ្ចប់បញ្ហា ប៉ុន្តែមកពីនាងយល់ថាវាដល់ដំណាក់កាលហួសពេលទើបនាងមិនទទួលយក។ នាងថាគោលដៅដែលនាងចូលបំភ្លឺនៅចំពោះមុខតុលាការ គឺចង់ប្រាប់តុលាការតែមួយគត់គឺសុំឲ្យតុលាការបន្តនីតិវិធីរហូតដល់ចប់ ដោយមិនទទួលយកការសម្រុះសម្រួលក្រៅប្រព័ន្ធ៕
