ក្រសួងមហាផ្ទៃប្តេជ្ញាលុបបំបាត់ផលិតផលក្លែងក្លាយឲ្យអស់នៅកម្ពុជា

ដោយ VOD Admin​​ | ថ្ងៃអង្គារ ទី១០ ខែតុលា ឆ្នាំ២០១៧​ ម៉ោង 5:04 PM | អភិបាលកិច្ចល្អ | 0 | 4115 ​សកម្មភាពកម្ទេចបំផ្លាញគ្រឿងសម្អាងក្លែងក្លាយ

ប្រធាននាយកដ្ឋានកណ្តាលនគរបាលយុត្តិធម៌នៃក្រសួងមហាផ្ទៃ ប្តេជ្ញាថា នឹងលុបបំបាត់ផលិតផលក្លែងក្លាយដែលនាំចូលពីបរទេសនិងផលិតក្នុងស្រុកឲ្យអស់នៅកម្ពុជា ដោយអះអាងថា ធ្វើឲ្យប៉ះពាល់ដល់សុខភាព និងខាតបង់សេដ្ឋកិច្ចជាតិ។

តាមការចុះផ្សាយរបស់អគ្គស្នងការដ្ឋាននគរបាលជាតិ នៅថ្ងៃចន្ទម្សិលមិញនេះ បានឲ្យដឹងថា ក្រសួងមហាផ្ទៃ ប្តេជ្ញាលុបបំបាត់ផលិតផលក្លែងក្លាយឲ្យអស់​នៅកម្ពុជា ដែល​មានការនាំចូលតាមច្រករបៀងមួយចំនួននៃប្រទេសជិតខាងទាំងបី និងខ្លះទៀតលួចផលិតនៅក្នុងស្រុក។

ប្រធាននាយកដ្ឋានកណ្តាលនគរបាលយុត្តិធម៌នៃក្រសួងមហាផ្ទៃ លោក អ៊ិន បូរ៉ា បានថ្លែងថា ផលិតផលក្លែងក្លាយមានផលប៉ះពាល់យ៉ាងខ្លាំងដល់សុខភាពអ្នកប្រើប្រាស់ ពិសេសធ្វើឲ្យខាតបង់ដល់សេដ្ឋកិច្ចប្រទេសជាតិផងដែរ។

ការថ្លែងបែបនេះ ធ្វើឡើងក្នុងពិធីបើកវគ្គបណ្តុះបណ្តាលមួយដល់នាយនគរបាលប្រឆាំងបទល្មើសសេដ្ឋកិច្ច នាព្រឹកថ្ងៃទី០៩ ខែតុលា ស្តីពី «ការប្រយុទ្ធប្រឆាំងផលិតផលក្លែងក្លាយបង្ករឲ្យប៉ះពាល់ដល់សុខភាព» នៅអគ្គស្នងការដ្ឋាននគរបាលជាតិ ដែលមានការឧបត្ថម្ភពីនាយកដ្ឋានប្រតិបត្តិការអន្តរជាតិបារាំង។

លោក អ៊ិន បូរ៉ា បញ្ជាក់ថា មន្ត្រីជំនាញត្រូវផ្សព្វផ្សាយបន្ថែមទៀតដល់ប្រជាពលរដ្ឋ ពីផលប៉ះពាល់ដែលកើតឡើងដោយផលិតផលក្លែងក្លាយនេះ  ពិសេសគឺ ផលប៉ះពាល់អំពីសារធាតុគីមីដែលបានផ្ទុកក្នុង ប្រហុក ផ្អក ប្រហិត និងសាច់មាន់ជាដើម។

គួរំលឹកផងដែរ កាលពីថ្ងៃ ០៥ខែតុលា កន្លងមកថ្មីៗនេះ កម្លាំងសមត្ថកិច្ចជំនាញបានកិនកម្ចេទចោល ផលិតផលគ្រឿងសម្អាងក្លែងក្លាយប្រមាណជាង ៨០តោននៅទីលានជើងឯកក្នុងរាជធានីភ្នំពេញ​។​

ម៉ាប់ ស៊ុយ Mabsuy168@gmail.com

សរសេរមកកាន់ VOD Admin តាមរយៈ vodadmin@vodhotnews.com

Loading...

ចាប់អារម្មណ៍នឹងព័ត៌មានប្រភេទនេះ? ចុះឈ្មោះដើម្បីទទួលបានព័ត៌មានថ្មីៗ

Fields marked with an * are required