លោកនាយករដ្ឋមន្ត្រី ហ៊ុន សែន បានអះអាងថា សិទ្ធិសេរីភាពពលរដ្ឋកម្ពុជា បាននាំមកវិញ បន្ទាប់ពីថ្ងៃជ័យជម្នះ ៧ មករា ១៩៧៩ លើរបបខ្មែរក្រហម។
លោកនាយករដ្ឋមន្ត្រី ហ៊ុន សែន បានអះអាងបែបនេះ នៅលើទំព័រហ្វេសប៊ុករបស់លោកនៅថ្ងៃនេះ ចំពេលដែលពិភពលោកប្រារព្ធទិវាសិទ្ធិមនុស្សអន្តរជាតិ ១០ ធ្នូ។
លោក ហ៊ុន សែន រៀបរាប់ថា៖ «ថ្ងៃ៧ មករា ១៩៧៩ គឺបាននាំមកវិញនូវសិទ្ធិសេរីភាព និងវឌ្ឍនភាពសម្រាប់ពលរដ្ឋកម្ពុជារហូតដល់សព្វថ្ងៃ»។
លោកបានអះអាងបន្ថែមថា នៅក្នុងរបបកម្ពុជាប្រជាធិបតេយ្យ ឬហៅកាត់ថា របបខ្មែរក្រហម ពលរដ្ឋខ្មែរគ្មានសិទ្ធិសេរីភាពអ្វីទាំងអស់ រួមទាំងសិទ្ធិរស់រានមានជីវិត និងសិទ្ធិទទួលទានអាហារគ្រប់គ្រាន់។
ទោះជាយ៉ាងណា ក្រុមអង្គការសង្គមស៊ីវិល ១០៣ស្ថាប័ន ក្នុងមានអង្គការសិទ្ធិមនុស្ស ក្រុមសហជីព និងសហគមន៍មានជម្លោះដីធ្លី បានលើកឡើងនៅក្នុងសេចក្ដីថ្លែងការណ៍រួមរបស់ពួកគេនៅថ្ងៃនេះថា លំហសិទ្ធិសេរីភាពជាមូលដ្ឋាន ដែលត្រូវបានធានាដោយរដ្ឋធម្មនុញ្ញ និងច្បាប់អន្តរជាតិ ត្រូវបានរឹតត្បិតយ៉ាងខ្លាំងនៅក្នុងរយៈពេលប៉ុន្មានខែចុងក្រោយនេះ។
ក្រុមអង្គការស៊ីវិលទាំង ១០៣ស្ថាប័ននោះ បានទទូចទៅរដ្ឋាភិបាលកម្ពុជា ឲ្យបញ្ឈប់ចំណាត់ការនានាទៅលើក្រុមអង្គការសង្គមស៊ីវិល សកម្មជនសិទ្ធិ និងក្រុមអ្នកសារព័ត៌មាន ដែលក្រុមអង្គការសង្គមស៊ីវិលបានហៅថា ជាការធ្វើទុក្ខបុកម្នេញ និងរឹតត្បិតសេរីភាពជាមូលដ្ឋានដោយមិនសមហេតុផល៕