គណៈកម្មការទី៧នៃរដ្ឋសភាដឹកនាំដោយគណបក្សប្រឆាំង ស្នើឲ្យក្រសួងធម្មការនិងសាសនាបង្កភាពងាយស្រួលឲ្យមានអត្តសញ្ញាណប័ណ្ណសម្រាប់ព្រះសង្ឃក្នុងការចុះឈ្មោះបោះឆ្នោត។
ការលើកឡើងនេះ គឺនៅពេលរដ្ឋមន្ត្រីក្រសួងធម្មការ និងសាសនា លោក ហ៊ឹម ឆែម បានចូលបំភ្លឺពាក់ព័ន្ធនឹង វិទ្យាស្ថានពុទ្ធសាសនបណ្ឌិត្យ ពុទ្ធិកសាកលវិទ្យាល័យ និងសហលក្ខខ្តិកៈមន្ត្រីសង្ឃ កាលពីម្សិលមិញ។
ប្រធានគណៈកម្មការ ទទួលបន្ទុកសាសនា នៃរដ្ឋសភាលោក យ៉ែម បុញ្ញឬទ្ធ បានថ្លែងប្រាប់អ្នកសារព័តមានថាគណកម្មការរបស់លោកទទួលយកការឆ្លើយបំភ្លឺរបស់រដ្ឋមន្ត្រីក្រសួងធម្មការលោក ហ៊ឹម ឆែម តែលោកថាចំណុចដែលគណកម្មការស្នើទៅកាន់ក្រសួងវិញនោះគឺការចង់ឲ្យមានការរៀបចំ សហលក្ខខន្តិកសម្រាប់មន្ត្រីសង្ឃដែលមិនទាន់មានចែងជាក់លាក់ និងស្នើឲ្យមានអត្តសញ្ញាណប័ណ្ណសម្រាប់ព្រះសង្ឃសម្រាប់បម្រើដល់ការប្រើប្រាស់ផ្សេងៗ ជាពិសេសការចុះឈ្មោះបោះឆ្នោត។
លោកថា៖ « ពីព្រោះពលរដ្ឋទាំងពីរភេទជាប្រជាពលរដ្ឋរបស់យើង មានចែងមានគាំពារនៅក្នុងរដ្ឋធម្មនុញ្ញ ដូច្នេះពាក្យថាដើម្បីសម្គាល់ថាជាប្រជាពលរដ្ឋត្រូវតែមានអត្តសញ្ញាណប័ណ្ណសម្គាល់អត្តសញ្ញាណ ដូច្នេះជាចំណុចមួយសំខាន់។ ពីមុនគេអាចប្រើប្រាស់ព្រះឆាយា អាចប្រើប្រាស់ប័ណ្ណមន្ត្រីរាជការទៅប្រើប្រាស់ក៏ប៉ុន្តែដោយសារច្បាប់យើងកែប្រែឲ្យទៅជាអត្តសញ្ញាណប័ណ្ណជាគោលជាមូលដ្ឋានដូច្នេះយើងត្រូវកែប្រែច្បាប់ទាំងអស់ហ្នឹងទៅតាមហ្នឹងដែរ » ។
លោកបានឲ្យដឹងដែរថាក្រសួងបានទទួលយកសំណើរនេះតែមិនទាន់មានការឆ្លើយតបជាយ៉ាងណានោះទេ ដោយរង់ចាំការពិភាក្សានៅក្នុងក្រសួងសិន។
ស្ថាបនិកបណ្តាញព្រះសង្ឃឯករាជ្យ ព្រះតេជគុណ ប៊ុត ប៊ុនតិញ មានថេរដីកាថាក្រសួងគួរតែរៀបចំអនុញ្ញាត្តិឲ្យព្រះសង្ឃមានអត្តសញ្ញាប័ណ្ណ មិនគួរចាត់ទុកព្រះសង្ឃជាមួយក្រុមមនុស្សមួយដែលមិនអាចធ្វើអត្តសញ្ញាណប័ណ្ណឲ្យបានដូចបច្ចុប្បន្ននេះទេ។ ព្រះអង្គមានសង្ឃដីកាបន្តថា ក្នុងការចុះឈ្មោះបោះឆ្នោតកន្លងទៅមានព្រះសង្ឃមិនដល់៣៥%ផងដែលបានទៅចុះឈ្មោះបោះឆ្នោត នេះក៏ព្រោះតែពុំមានអត្តសញ្ញាណប័ណ្ណ និងកង្វះព័ត៌មាន។
ព្រះអង្គថាបើទោះជាមានឆាយាសម្រាប់ព្រះសង្ឃក៏ដោយ ក៏អត្តសញ្ញាណប័ណ្ណគឺនៅតែសំខាន់ដដែលព្រោះអត្តសញ្ញាណប័ណ្ណជាការបញ្ជាក់របស់ជាតិ។ ព្រះអង្គចាត់ទុកថាការមិនអនុញ្ញាត្តិឲ្យព្រះសង្ឃមានអត្តសញ្ញាណប័ណ្ណនេះជាការប្រមាថមួយដល់អ្នកបួស។
ព្រះអង្គមានថិរដីការបន្ថែមថា៖ « ព្រះសង្ឃខ្មែរជាជនជាតិខ្មែរ ត្រូវមានអត្តសញ្ញាណប័ណ្ណជាតិមួយ ហើយដល់ពេលដែលចូលទៅបួសមានឆាយាមួយដើម្បីសម្គាល់ពីអង្គភាពសាសនា អាហ្នឹងមានអីខុស រឿងប៉ុនហ្នឹងដែលចេះមកប្រមាថអ្នកបួសទៅរួចដែលអាត្មាថា រឿងដែលខុសនោះគឺធ្វើបានដោយងាយស្រួលណាស់ពួកអស់នោះ រឿងត្រឹមត្រូវធ្វើមិនកើតសោះ ហ្នឹងហើយបានគេថាល្ងើណា!»។
គួរបញ្ជាក់ផងដែរថា ដើម្បីបំរើដល់ការចុះឈ្មោះបោះឆ្នោតថ្មីច្បាប់បានតម្រូវឲ្យអ្នកចុះឈ្មោះបោះឆ្នោតទាំងនោះត្រូវមានអត្តសញ្ញាណប័ណ្ណសញ្ជាតិខែ្មរ តែសម្រាប់ព្រះសង្ឃក្នុងការចុះឈ្មោះគឹទាល់តែមាន លិខិតបញ្ជាក់អត្តសញ្ញាណ។
សង្គមស៊ីវិលដែលធ្វើការខាងបោះឆ្នោតធ្លាប់បានស្នើរទៅគ.ជ.ប ឲ្យធ្វើការផ្សព្វផ្សាយជម្រុញឲ្យព្រះសង្ឃទៅចុះឈ្មោះបោះឆ្នោតបាន តែត្រូវបានគ.ជ.ប ឆ្លើយតបថាខ្លួនមិនដែលហាមព្រះសង្ឃមិនឲ្យចុះឈ្មោះបោះឆ្នោតឡើយ ខណៈដែលព្រះសង្ឃតិចតួចប៉ុណ្ណោះបានទៅចុះឈ្មោះបោះឆ្នោតនៃចំនួនព្រះសង្ឃសរុបជិត៦ម៉ឺនអង្គ៕