សារព័ត៌មានអង់គ្លេស BBC បានចុះផ្សាយថា មនុស្សយ៉ាងតិច ២៥នាក់ បានស្លាប់នៅក្នុងហេតុការណ៍គ្រោះថ្នាក់រថយន្តក្រុងមួយនៅភាគខាងលិចនៃកោះជ្វា កាលពីថ្ងៃម្សិលមិញនេះ នៅពេលរថយន្តក្រុងដឹកភ្ញៀវទេសចរនោះ បានរត់ធ្លាក់ចេញពីផ្លូវ ហើយក្រឡាប់។
សារព័ត៌មានដដែលនេះ បានចុះផ្សាយបន្តថា រថយន្តក្រុងនោះ ដឹកអ្នកដំណើរ ៤០នាក់ ទៅទស្សនាកន្លែងទឹកផុសមួយ មុននឹងវាជួបគ្រោះថ្នាក់នៅតំបន់ស៊ូបាង ស្ថិតនៅខេត្តជ្វាខាងលិច។
ដោយបានដកស្រង់សេចក្ដីរាយការណ៍របស់សារព័ត៌មានក្នុងស្រុកនោះ BBC បានរាយការណ៍ថា រថយន្តនោះប្រហែលជាបុកគ្នាជាមួយម៉ូតូមួយគ្រឿង នៅពេលវារេចង្កូតធ្លាក់ចេញពីផ្លូវ។
បើតាម BBC គ្រោះថ្នាក់ចរាចរណ៍ គឺជាបញ្ហាកើតឡើងញឹកញាប់នៅឥណ្ឌូនេស៊ី។
កាលពីថ្ងៃទី១០ ខែកក្កដាឆ្នាំមុន មនុស្ស ១០នាក់ បានស្លាប់ នៅពេលរថយន្តក្រុងមួយគ្រឿងធ្វើដំណើរពីកោះបាលីទៅទីក្រុងមួយស្ថិតនៅភាគខាងកើតកោះជ្វា បានបុកពីក្រោយរថយន្តធុនធំមួយគ្រឿង៕