ទីភ្នាក់ងារព័ត៌មានបារាំង AFP បានចុះផ្សាយថា មេដឹកនាំកូរ៉េខាងជើង លោក គីម ជុងអ៊ុន កាលពីថ្ងៃម្សិលមិញនេះ បានអញ្ចើញប្រធានាធិបតីកូរ៉េខាងត្បូង លោក មូន ជែអ៊ីន ឲ្យចូលរួមជំនួបកំពូលមួយនៅទីក្រុងព្យុងយ៉ាង បើទោះបីជាអាមេរិកបានព្រមានអំពីការវាយប្រហាររបស់ក្រុងព្យុងយ៉ាងអំឡុងពេលប្រារព្ធពិធីកីឡាអូឡាំពិកក៏ដោយ។
AFP បានចុះផ្សាយបែបនេះ ដោយផ្អែកតាមអ្នកនាំពាក្យវិមានខៀវក្រុងសេអ៊ូល បន្ទាប់ពីជំនួបរវាងលោក មូន និងប្អូនស្រីមេដឹកនាំកូរ៉េខាងជើង អ្នកស្រី គីម យ៉ូជុង ដែលបានបញ្ជូនលិខិតអញ្ចើញរបស់លោក គីម ទៅដល់លោក មូន សម្រាប់ជំនួបកំពូលមួយនាពេលឆាប់ៗ។
ជំនួបនោះ នឹងក្លាយទៅជាជំនួបកំពូលលើកទី ៣ បន្ទាប់ពីឪពុក និងជីតារបស់លោក គីម ជុងអ៊ុន បានជួបជាមួយប្រធានាធិបតីកូរ៉េខាងត្បូងលោក គីម ដេជុង នៅឆ្នាំ២០០០ និងលោក រ៉ូ មូយ៉ុន នៅឆ្នាំ២០០៧ នៅឯទីក្រុងព្យុងយ៉ាង។
ភ្លាមៗនោះ លោក មូន មិនបានឆ្លើយតបនឹងការអញ្ចើញនេះទេ ប៉ុន្តែ ទិដ្ឋភាពបែបនេះ អាចបង្ហាញឲ្យឃើញនូវការបាក់បែកគ្នារវាងមេដឹកនាំសន្តិភាពនិយម ដែលស្វែងរកការជជែកជាមួយមេដឹកនាំកូរ៉េខាងជើង ដើម្បីវិលត្រឡប់ទៅតុចរចារវិញ និងប្រធានាធិបតីអាមេរិក លោក ដូណាល់ ត្រាំ ដែលបានជេរប្រមាថ និងគំរាមវាយប្រហារគ្នាជាមួយលោក គីម ជុងអ៊ុន កាលពីឆ្នាំមុន។
ក្រុងវ៉ាស៊ីងតោន បានទទូចថា ក្រុងព្យុងយ៉ាង ដែលកំពុងស្ថិតក្រោមទណ្ឌកម្មជាច្រើនពីក្រុមប្រឹក្សាសន្តិសុខអង្គការសហប្រជាជាតិនោះ ត្រូវតែបោះជំហានយ៉ាងរឹងមាំឆ្ពោះទៅរកការរំសាយកម្មវិធីនុយក្លេអ៊ែររបស់ខ្លួន មុននឹងការចរចារណាមួយអាចកើតឡើងបាន៕