មន្រ្តីនគរបាលចំនួន២០នាក់នៃបណ្ឌិត្យសភានគរបាលត្រូវបានរដ្ឋមន្រ្តីក្រសួងមហាផ្ទៃសម្រេចបណ្តេញចេញពីក្របខណ្ឌមន្រ្តីនគរបាលជាតិនិង២នាក់ទៀតត្រូវបានដកហូតមុខតំណែអ ដោយសំអាងថាពួកគេមិនបានមកបំពេញការងារនិងអសកម្មនឹងការងារ។
នៅក្នុងប្រកាសចុះហត្ថលេខាដោយរដ្ឋមន្រ្តីមហាផ្ទៃ លោក ស ខេង នៅថ្ងៃទី២៦ខែកុម្ភៈ ហើយវីអូឌី(VOD )ទើបទទួលបាន ក្រសួងមហាផ្ទៃបញ្ជាក់ថាត្រូវបានអនុវត្តវិន័យចំពោះមន្រ្តីនគរបាល២០នាក់នៃបណ្ឌិត្យសភានគរបាលកម្ពុជា ដោយដកហូតតមុខតំណែង ឋានន្តរសក្តិនិងបណ្តេញចេញផុតពីក្របខណ្ឌមន្រ្តីនគរបាលជាតិ។ បើតាមការពិនិត្យលើប្រកាសនោះ ក្នុងចំណោមមន្រ្តីទាំង២០នាក់នោះ មន្រ្តីមានឋានន្តរសក្តិជាវរសេនីយ៍ត្រីមានចំនួន៤នាក់ អនុសេនីយ៍ឯកចំនួន៣នាក់ អនុសេនីយ៍ទោ៥នាក់ អនុសេនីយ៍ត្រី ២នាក់ ពលបាលទោ៣នាក់និងពលបាលត្រី២នាក់។ ប្រកាសបញ្ជាក់ថាការបណ្តេញចេញនេះដោយសារមន្រ្តីទាំងនោះ”បោះបង់ចោលការងារ”។
ក្រសួងមហាផ្ទៃបានបញ្ជាក់ថាប្រាក់បៀវត្សនិងរបបឧបត្ថម្ភផ្សេងៗត្រូវបានកាត់ផ្តាច់និងលុបចេញពីក្របខណ្ឌមន្រ្តីនគរបាលជាតិចាប់ពីខែឧសភា ឆ្នាំ២០១៦។
ចំណែកប្រកាសមួយទៀតចុះថ្ងៃទី២៦ខែកុម្ភៈដូចគ្នា ក្រសួងមហាផ្ទៃបានសម្រេចដកហូតមុខតំណែងមន្រ្តីនគរបាលជាតិ២នាក់ដែលមានឋានន្តរសក្តិជាវេសេនីយ៍ត្រីនិងអនុសេនីយ៍ឯកពីមុខងារជានាយរងការិយាល័យសម្ភារៈឧបទ្ទេសនិងសោតទស្សន៍និងជានាយរងការិយាល័យបច្ចេកទេសមធ្យោបាយនៃសាលាមធ្យមបច្ចេកទេស។ ក្រសួងបញ្ជាក់ថាមន្រ្តីទាំងពីរនាក់នោះអសកម្មការងារ។
បណ្ឌិត្យសភានគរបាលកម្ពុជាបានសរសេរនៅលើហ្វេសប៊ុករបស់ខ្លួនកាលពីថ្ងៃព្រហស្បតិ៍ថាការដកមុខតំណែងឋានន្តរសក្តិនិងបណ្តេញចេញពីក្របខណ្ឌមន្ត្រីនគរបាលជាតិគឺធ្វើឡើងតាមស្នើសុំរបស់បណ្ឌិត្យសភានគរបាលកម្ពុជា។ បណ្ឌិត្យសភានគរបាលកម្ពុជាបញ្ជាក់ថានេះជាកំណែទម្រង់មួយ។
បណ្ឌិត្យសភាលើកឡើងថា៖ “គួរបញ្ជាក់ផងដែរថាមួយរយៈចុងក្រោយនេះ បណ្ឌិត្យសភានគរបាលកម្ពុជាបានធ្វើកំណែទម្រង់ជុំវិញការងារសំខាន់ៗមួយចំនួន រួមមាន៖ ការងារដឹកនាំ គ្រប់គ្រង ការអភិវឌ្ឍកម្មវិធីអប់រំ ការអភិវឌ្ឍសមត្ថភាពគ្រូបង្រៀន ការអភិវឌ្ឍសមត្ថភាពនិស្សិត-សិក្ខាកាម ការពង្រឹងវិន័យនិស្សិត-សិក្ខាកាម ការពង្រឹងសមត្ថភាពស្រាវជ្រាវវិទ្យាសាស្ត្រនគរបាល និងការពង្រីកកិច្ចសហប្រតិបត្តិការអន្តរជាតិ សំដៅលើកកម្ពស់គុណភាពអប់រំ បណ្តុះបណ្តាលមន្ត្រីនគរបាលជាតិនិងមន្ត្រីពន្ធនាគារឲ្យមានសមត្ថភាពពេញលេញ ដើម្បីឆ្លើយតបទៅនឹងតម្រូវការអង្គភាពប្រើប្រាស់កងកម្លាំងនិងតម្រូវការរបស់ប្រទេសជាតិ”៕