នៅចុងខែមីនានេះ ក្រុមហ៊ុនទូរស័ព្ទចល័តធំមួយនៅក្នុងប្រទេសកម្ពុជា នឹងចំណាយទុនរបស់ខ្លួនដល់រាប់សែនដុល្លារ ដើម្បីរៀបចំព្រឹត្តិការណ៍ការប្រគំតន្ត្រីអន្តរជាតិធំជាលើកទី៣ ដោយមានតារាវត្តមានតារាចម្រៀងល្បីឈ្មោះរបស់ប្រទេសកូរ៉េខាងត្បូងគឺលោក Rain មកច្រៀងដោយផ្ទាល់នៅភ្នំពេញ។ ព្រឹត្តិការណ៍នេះ ត្រូវបានប្រកាសថា មិនមានការលក់សំបុត្រនោះទេ ដោយអ្នកចង់ទស្សនាផ្ទាល់ លុះត្រាជាអតិថិជនរបស់ក្រុមទូរស័ព្ទចល័តមួយនេះ ហើយប្រើសេវាកម្មមួយចំនួន ទើបអាចទៅបើកសំបុត្រដើម្បីចូលទស្សនាបាន។
លោក Thomas Hundt នាយកប្រតិបត្តិក្រុមហ៊ុនស្មាតបានអះអាងថា ដើម្បីផ្ដល់បទពិសោធន៍ក្នុងការរៀបចំតន្ត្រីយក្សអន្តរជាតិនៅកម្ពុជា និងដើម្បីលើកទឹកចិត្តដល់អតិថិជនរបស់ក្រុមហ៊ុនខ្លួន ទើបក្រុមហ៊ុនស្មាតសម្រេចរៀបចំការប្រគំតន្ត្រីនេះឡើយង ដោយចំណាយតម្លៃខ្លួនខ្ពស់អញ្ជើញតារាចម្រៀង K-Pop របស់កូរ៉េ គឺលោក Jung Ji-hoon ហៅលោក Rain វ័យ៣៤ឆ្នាំឲ្យមកច្រៀងនៅភ្នំពេញដោយផ្ទាល់។
លោកថាព្រឹត្តិការណ៍នេះ សម្រេចធ្វើឡើងនៅទីវាលកោះពេជ្រទល់មុខមហោស្រព ដោយត្រូវរំពឹងថានឹងមានអ្នកទស្សនាយ៉ាងហោច៣៥ ០០០នាក់។ លោកថា ក្រុមហ៊ុនស្មាតបានត្រៀមសំបុត្រទស្សនាចន្លោះ ពី៣៥ ០០០ ទៅ៣៧ ០០០សំបុត្រ ដោយអតិថិជនដែលប្រើប្រាស់សេវាកម្មរបស់ក្រុមហ៊ុនស្មាត សុទ្ធតែអាចទៅកាន់សាខារបស់ក្រុមហ៊ុនដើម្បីដូរយកសំបុត្ររហូតដល់អស់សំបុត្រ។
យ៉ាងណាមិញ សម្រាប់អតិថិជន ដែលទៅបើកសំបុត្រក្រោយការផ្ដល់ជូនដល់៣៧ ០០០សំបុត្រ នឹងមិនទទួលបានសំបុត្រទស្សនានោះទេ ដោយសារតែព្រឹត្តិការណ៍នេះ ក៏មិនអាចទទួលអ្នកទស្សនាឲ្យលើសនេះបាន។ លោកថា នៅក្នុងព្រឹត្តិការណ៍នេះ ក៏មានវត្តមានតារាចម្រៀងរបស់ខ្មែរដែលត្រូវគេស្គាល់ថាជាក្រុមតារាចម្រៀង Original Song ដូចជាក្រុមក្មេងខ្មែរ កញ្ញាអេដា និងកញ្ញាឡូរ៉ាម៉ម ជាដើមឲ្យចូលច្រៀងផងដែរ ដើម្បីចែករំលែកបទពិសោធន៍រវាងតារាចម្រៀងពិភពលោករបស់ប្រទេសកូរ៉េ និងតារាចម្រៀងខ្មែរ អោយបានច្រៀងរាំរួមគ្នានៅលើឆាកធំជាអន្តរជាតិ។
ព្រឹត្តិការណ៍នេះ ត្រូវបានប្រកាសថាមានផ្សាយបន្តផ្ទាល់នៅលើកញ្ចក់ទូរទស្សន៍ SEATV ដោយអ្នករៀបចំកម្មវិធីរំពឹងយ៉ាងខ្លាំងថា នឹងធ្វើឲ្យកក្រើកកោះពេជ្រលើសពីការរៀបចំកាលពី២លើកមុន។ លោកថាតារាចម្រៀង Original របស់កម្ពុជានឹងមានឱកាសកាន់តែច្រើនក្នុងការបង្ហាញវត្តមាន និងសមត្ថភាពជាមួយតារាចម្រៀងអន្តរជាតិគឺលោក Rain ក្នុងការបង្ហាញដល់ពិភពលោក។
ព្រឹត្តិការណ៍តន្ត្រីយក្សនេះ ក៏នឹងមានការប្រកាសថាមានអ្នកគាំទ្ររបស់លោក Rain ច្រើននាក់រង់ចាំស្វាគមន៍ដល់លោកនៅបរិវេណព្រលាន ក្នុងពេលសន្និសីទ និងក្នុងពេលប្រគំតន្ត្រី ដែលពិតជាធ្វើអោយទីលានប្រគំតន្ត្រីមានការចាប់អារម្មណ៍ខ្ពស់ផងដែរ។ នេះបើយោងតាមអ្វីដែលលោកបានបញ្ជាក់តាមរយៈសន្និសិទ្ធកាសែតកាលពីថ្ងៃទី៩មីនា។
បុគ្គលិកជាជនជាតិខ្មែរម្នាក់ ដែលត្រូវគេស្គាល់ថាមានតំណែងខ្ពស់នៅក្នុងក្រុមហ៊ុនស្មាត បានបញ្ជាក់ដោយសុំបញ្ចេញឈ្មោះថា កាលពីឆ្នាំ២០១៦ ព្រឹត្តិការណ៍ប្រគុំតន្ត្រីយក្សមួយនេះមិន បានធ្វើឡើងនោះទេ ដោយសារតែការរៀបចំមិនទាន់ តែកាលពីរៀបចំក្នុងឆ្នាំ២០១៤និង២០១៥ គឺបានទទួលជោគជ័យខ្លាំងក្នុងការរៀបចំ។ បុគ្គលិកដដែលបន្តថា ក្រុមហ៊ុនស្មាននឹងប្រឹងប្រែងរៀបចំព្រឹត្តិការណ៍នេះអោយបានរៀងរាល់ឆ្នាំមួយឆ្នាំម្ដង ដោយការរៀបចំឡើងវិញនៅថ្ងៃទី៣០មីនា ក្នុងឆ្នាំ២០១៧នេះ គឺជាចាប់ផ្ដើម ហើយនឹងធ្វើអោយបានទៀតទាត់សម្រាប់ឆ្នាំក្រោយ។
លោកថាតាមគម្រោង លោក Rain នឹងមកដល់ប្រទេសកម្ពុជានៅព្រឹកថ្ងៃទី៣០មីនា គឺប៉ុន្មានម៉ោងមុនការប្រគំតន្ត្រី ដោយក្រោយបញ្ចប់សន្និសីទធំមួយ ក៏បង្ហាញខ្លួនច្រៀងរាំតែម្ដងនៅពេលយប់។
យ៉ាងណាមិញលោកថា នៅមិនទាន់បានដឹងពីគម្រោងថា តារាចម្រៀងកូរ៉េមួយនេះ អាចនឹងធ្វើអ្វីខ្លះនៅកម្ពុជាបន្ថែមពីលើគម្រោងមកច្រៀង ឬត្រលប់ទៅវិញភ្លាមៗនោះទេ ដោយសារតែលោកបានដឹងត្រឹមថាលោក Rain ចុះមកច្រៀងតាមកិច្ចព្រមព្រៀងនាយប់ថ្ងៃទី៣០មីនា។
ច្ចព្រមព្រៀងនាយប់ថ្ងៃទី៣០ be professional media pratictioner លោកថាការប្រគំតន្ត្រីយក្សកាលពីលើកទី១និងទី២ មានវត្តមានដោយតារាចម្រៀងមកពីអាមេរិកគឺ Demi Lovato និង Jessie J ដោយការប្រគំតន្ត្រីនាពេលនោះជោគជ័យហួសពីការរំពឹង។ អ៊ីចឹងហើយ ទើបវត្តមានតារាចម្រៀង Rain នៅដំណាច់ខែមីនានេះ ពិតជាធ្វើអោយព្រឹត្តិការណ៍ប្រគំតន្ត្រីទាំងមូលកក្រើក។
លោកថា វត្តមានរបស់តារាចម្រៀងល្បីឈ្មោះរបស់ប្រទេសកូរ៉េ គឺលោក Rain នឹងធ្វើអោយមានការចាប់អារម្មណ៍ចំពោះកម្ពុជាខ្លាំងឡើង ជាពិសេសចំពោះវិស័យចម្រៀងនៅក្នុងប្រទេសកម្ពុជា ហើយកម្ពុជាក៏នឹងចំណេញអ្នកទេសចរណ៍អន្តរជាតិផងដែរ នៅពេលលោក Rain ដែលជាតារាល្បីល្បាញបញ្ចប់ការច្រៀងនៅកម្ពុជាលើកទី១៕