អតីតមេដឹកនាំគណបក្សប្រឆាំង លោក សម រង្ស៊ី នៅថ្ងៃនេះ បានបដិសេធថា លោកមិនដែលនិយាយដល់ទាល់តែសោះអំពីជីវិតឯកជននៃគ្រួសារមេដឹកនាំម្នាក់ តែប៉ុន្មានថ្ងៃក្រោយពីមានការចោទប្រកាន់ជាសាធារណៈពីលោកនាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន កាលពីថ្ងៃទី០៦ ខែមីនា បានថ្លែងថា លោកនឹងមិនអនុគ្រោះដល់លោក សម រង្ស៊ី នោះឡើយ ដោយថា អតីតមេដឹកនាំបក្សរូបនេះ បានចោទភរិយា និងកូនប្រុសរបស់លោក គឺលោក ហ៊ុន ម៉ាណែត ថាជាស្រីកំណាន់ និងជាកូនមេដឹកនាំវៀតណាម ឡេ ឌឹកថូ។
លោក ហ៊ុន សែន បញ្ជាក់ថា តំណាងរាស្ត្របក្សប្រឆាំង លោក ម៉ៅ មុនីវណ្ណ បានផ្ញើសារទៅលោកថា លោក សម រង្ស៊ី បានចោទប្រកាន់បែបនេះ នៅក្នុងកិច្ចប្រជុំផ្ទៃក្នុងបក្សផងដែរ។
ទោះជាយ៉ាងណា នៅលើទំព័រហ្វេសប៊ុករបស់លោក នៅថ្ងៃនេះ លោក សម រង្ស៊ី បានបដិសេធថា លោកមិនដែលលើកឡើងទាល់តែសោះពីរឿងឯកជនរបស់មេដឹកនាំខ្លះ។
ផ្ទុយទៅវិញ អតីតមេបក្សប្រឆាំងរូបនេះ បានចាត់ទុករឿងនេះ ជាការមូលបង្កាច់របស់អ្នកដឹកនាំខ្លះ ដែលលោកថា មានចរឹតថោកទាប មិនគិតគូរដោះស្រាយបញ្ហាប្រទេសជាតិទេ តែពូកែចំណាយពេលលបមើលគេ លួចស្ដាប់គេ និងលួចថតសំឡេងគេយកទៅកាត់ត ដើម្បីលាតត្រដាងរឿងឯកជនរបស់អ្នកដទៃ៕